Туркманистоннинг Лебоб вилояти маъмурий маркази Туркманободдаги карантин зонасидан 15 киши қочиб кетди. Улар Туркия, Россия ва МДҲ давлатларидан қайтиб келган бўлиб, 14 кун давомида изоляцияда бўлиши керак эди, деб хабар беради Asia-Plus.
Тахминларга кўра, қочоқлар шифокорларга пора берган бўлиши мумкин. «Миллий хавфсизлик вазирлиги ходимлари уларни уйида қўлга олиб, яна карантинга юборди. Ҳозирда улар жаримага тортилиши ёки бир йилгача қамоқ жазосига ҳукм этилиши мумкин», — дейилади хабарда.
Туркманободдаги карантин зонаси февраль ойининг бошида ташкил этилган бўлиб, жадвал бўйича Ашхободга қўниши керак бўлган барча самолётлар шу ерга йўналтирилган. Гувоҳларнинг сўзларига кўра, изоляция қилинган фуқаролар аввал бошидан қаттиқ назорат остида бўлмаган.
Таъкидланишича, Хитойдан келган фуқаролар сақланган махсус лагерни обрўли амалдорга қўнғироқ қилиш орқали ёки полициячиларга 100-150 доллар пора бериб, 20 дақиқа ичида тарк этиш имкони бўлган.
Туркманистонга қайтиб, лагерга жойлаштирилган фуқароларнинг айтишича, коронавирусни карантиндан ташқарида юқтириб олишдан кўра, лагер ичида касалланиш эҳтимоллиги юқори. Чунки хориждан қайтиб келган барча йўловчилар битта палаткага жойлаштирилган.
Ҳар бир палаткага 20 та икки қаватли каравотлар жойлаштирилган бўлиб, улар бир-биридан изоляцияланмаган, хусусан, янги келган фуқаролар эскилари билан бир жойда ётган.
Туркманистон республикада COVID-19 ҳолатлари мавжуд эмаслигини таъкидламоқда, шунга қарамай Лебобда иситмаси юқори бўлган фуқаролар касалхоналарда қайд этилмасдан дарҳол даволаниш муолажаларига олиняпти. Коронавирус белгилари бўлган беморларга эса натижа салбий бўлганлиги ҳақида айтилмоқда.
Аввалроқ туркманистонлик амалдорлар коронавирусдан ҳимояланиш учун қўриқхонага кўчиб ўтгани ҳақида хабар берилганди.
Изоҳ (0)