Самарқанд вилоятида коронавирусга чалинган биринчи бемор кимлиги маълум бўлди, дея хабар беради «Дарё» мухбири Фарҳод Норбўтаев.
Маълум бўлишича, Самарқанд вилоятида яшовчи фуқаро 4 апрель, шанба куни, томоқ оғриши ва тана ҳароратининг кўтарилиши билан яшаш ҳудудидаги поликлиникага мурожаат қилган. Врач-инфекционист кўригида бўлган беморнинг тана ҳарорати кўтарилганлиги учун зудлик билан изоляторга олиниб, ундан олинган суртмалар вилоят санитария-эпидемиологик осойишталик маркази вирусология лабораториясига юборилган.
Самарқанд вилоят соғлиқни сақлаш бошқармаси ахборот хизматининг маълум қилишича, ўтказилган вирусологик таҳлил натижасида беморда COVID-19 инфекцияси аниқланган. Ушбу таҳлил натижасини тасдиқлаш учун республика СЭО агентлигига юборилган.
Лаборатория натижаси асосида бемор тез тиббий ёрдам машинасида вилоят юқумли касалликлар шифохонасида алоҳида боксга жойлаштирилган. Шунингдек, бемор билан мулоқотда бўлган фуқаролар ҳам вилоят юқумли касалликлар шифохонасига ётқизилган.
Шу вақтга қадар вилоят юқумли касалликлар шифохонасида карантин назоратида бўлган фуқаролар зудлик билан бошқа муассасага кўчирилган.
Ҳозирда бемор белгиланган стандартлар асосида даволанмоқда. Унинг аҳволи яхши.
«Вилоят соғлиқни сақлаш бошқармаси фуқаролардан карантин қоидаларига риоя қилиб, уйдан чиқмаслик, жамоат жойларида тўпланмаслик, шахсий гигиена қоидаларга қатъий амал қилишни сўрайди», — дейди бошқарма ахборот хизмати раҳбари Элдор Муҳаммадиев.
Маълумот учун, бугунга қадар Самарқандда жами карантинга олинган фуқаролар 3913 нафарни ташкил этади. Шундан 1191 нафари стационар шароитда назоратга олинган.
Эслатиб ўтамиз, Соғлиқни сақлаш вазирлиги коронавирусга чалинган беморлар айни кунда 504 нафар эканлигини қайд этиб, уларнинг қайси вилоятлардан эканлигини эълон қилганди.
Изоҳ (0)