Япония бош вазири Синдзо Абэ мамлакатда 7 апрель кунидан бошлаб фавқулодда ҳолат эълон қилиш режалаштирилаётганини маълум қилди, деб хабар берди NHK телеканали.

Фото: AP Photo

Синдзо Абэнинг сўзларига кўра, у 7 апрелдан бошлаб фавқулодда ҳолат режимини жорий этишни режалаштирмоқда. Чоралар пойтахт Токио ва олтита префектура, хусусан, Осака, Фукуока, Тиба, Кангава, Сайтама, Хёгога нисбатан қўлланилади. Аввалроқ фавқулодда ҳолат биринчи навбатда йирик шаҳарлар — Токио ва Осакага тегишли бўлиши кутилаётгани ҳақида хабар берилган эди.

Шу билан бирга, Синдзо Абэ хорижий давлатлардан фарқли равишда шаҳарлар ёпилмаслигини таъкидлаб ўтган.

Бундан ташқари, бош вазир коронавируснинг салбий таъсирини пасайтиришга қаратилган инқирозга қарши чораларни ҳам эълон қилган. Мазкур чоралар учун 108 триллион иена (989 миллиард доллар) ажратилади, бу мамлакат ялпи ички маҳсулотининг тахминан 20 фоизини ташкил қилади.

Хусусан, маблағлар пандемия шароитида зарар кўрган корхоналарни қўллаб-қувватлашга йўналтирилади. Бундан ташқари, қарийб 5,5 миллиард доллар миқдоридаги маблағ коронавирус тарқалишининг олдини олиш мақсадида жорий қилинган чекловлар сабабли даромади камайган кишиларга тўлаб берилади. Пандемия сабабли даромади пасайиб кетган ҳар бир оилага тахминан 2,7 минг доллардан тўланади.

Япония ҳукумати март ойида коронавирус сабабли мамлакатда фавқулодда ҳолат эълон қилишга имкон берувчи вақтинчалик қонунни маъқуллаган. Зарур ҳолатда Япония бош вазири Синдзо Абэ коронавирус тарқалиши сабабли мамлакатнинг маълум бир ҳудудлари учун фавқулодда ҳолат эълон қилиши мумкин.

Фавқулодда ҳолат эълон қилинганидан кейин маҳаллий ҳокимиятлар маҳаллий аҳолидан уйдан чиқмасликни талаб қилиш ҳуқуқига эга бўлади. Шунингдек, маҳаллий расмийлар хусусий ер участкалари ва иншоотлардан тиббий ёрдам кўрсатиш мақсадида фойдаланиши мумкин бўлади. Агар мазкур мулклар эгалари объектларни фойдаланишга беришдан бош тортса, маҳаллий расмийлар зарур бўлган мулкни мусодара қилиш ҳуқуқига эга.

Сўнгги маълумотларга кўра, Японияда коронавирусга чалинганлар сони 4500 кишидан ошган, уларнинг қаторига Diamond Princess кемасининг 712 нафар йўловчиси ва экипаж аъзолари ҳам киради. Мазкур кема Япониянинг Йокогама шаҳри портида бир ярим ой давомида карантинда турган эди. Касалланганларнинг катта қисми — 1033 киши пойтахт Токиода қайд этилган. Ундан кейинги ўринда Осака префектураси (408 нафар бемор) турибди. Мамлакат бўйича касалликдан жами 106 киши вафот этган.

Эслатиб ўтамиз, 2020 йилда Токиода бўлиб ўтиши режалаштирилган ёзги Олимпия ўйинлари коронавирус сабабли 2021 йилга қолдирилди. Ўйинлар 2021 йилнинг 23 июлида бошланиб, 4 августга қадар давом этади.