Шотландиянинг бош шифокори Кэтрин Кэлдервуд 5 апрель куни истеъфога чиқди. Бунга у коронавирус сабабли «ўзини яккалаш» режимини икки марта бузгани ва дам олиш учун уйига боргани ортидан юзага келган вазият сабаб бўлган. Бу ҳақда Шотландия ҳукумати якшанба куни маълум қилди, дея хабар берди «РИА Новости».
Шотландиянинг бош шифокори сифатида Кэлдервуд фуқароларга уйда қолишни тавсия қилган, бироқ унинг ўзи дам олиш кунлари дам олиш учун ўз уйига борган. Бош шифокорнинг уйга бораётгани The Scottish Sun нашрининг фотомухбири томонидан суратга олинган. Шунингдек, мансабдор карантин қоидасини икки марта бузгани маълум бўлган. Бу эса унинг ҳаракатлари устидан муҳокамаларни келтириб чиқарган.
Бош шифокор қоидаларни бузгани ва ўз ҳаракатлари учун омма олдида узр сўраган, шунингдек, Шотландия ҳукуматининг матбуот анжуманидан четлаштирилган. Шотландия ҳукумати раҳбари Никола Стержен бош шифокорни ҳимоя қилишга уринган, бироқ якунда унинг истеъфоси ҳақида қарор қабул қилинган.
Эслатиб ўтамиз, Буюк Британия қироличаси Елизавета II коронавирус сабаб Буюк Британия ва Ҳамдўстлик давлатлари аҳолисига телемурожаат йўллади. Коронавирус юқтириб олган Буюк Британия бош вазири Борис Жонсон эса касалхонага ётқизилди.
Изоҳ (0)