COVID-19 коронавируси келтириб чиқарган касаллик оқибатида вафот этганлар сони 50 нафардан ошиб кетди. Бу ҳақда инфекцияга қарши курашиш тезкор федерал штабига таяниб, «РБК» хабар қилган.
6 апрель тонгги ҳолатига кўра, коронавирусдан вафот этганлар сони 47 нафарни ташкил қилган. Аммо кейинчалик Москва вилояти ҳукумати бир сутка ичида коронавирус билан касалланган 7 нафар беморнинг вафот этгани ҳақида хабар қилди.
Шунингдек, Бурятия ҳокимлиги коронавирусга топширган таҳлили ижобий натижа кўрсатган 73 ёшли бемор аёлнинг вафот этганини тасдиқлаган.
«Минг афсуски, бизда коронавирус инфекцияси билан касалланган беморлардан бири вафот этди. Бу биринчи ўлим ҳолати. Икки ёқлама пневмония 2-типдаги қандли диабет, артериал гипертония, аввал кузатилган инсульт беморни ҳаётдан олиб кетди», — дейилади Бурятия ҳокимлигининг ахборотида.
Иркутск вилоятида ҳам бир нафар беморнинг коронавирус инфекцияси келтириб чиқарган касаллик оқибатида вафот этгани хабар қилинган.
«Бугун вилоят юқумли касалликлар касалхонасида расман коронавирусга чалингани маълум қилинган бемор вафот этди. Эркак 62 ёшда эди. 6 апрель соат 14:00 ҳолатига кўра, Иркутск вилоятида коронавирус юқтириб олиш бўйича 13 та ҳолат рўйхатга олинган, бир нафар беморнинг таҳлилларида шубҳа мавжуд, яна тўрт нафар бемордаги шубҳали натижаларда ташхис ўз тасдиғини топмаган», — дейилади Иркутск вилояти ҳокимлигининг хабарида.
Мавзуга доир:
«Касаллик ёшга қарамайди. Шаҳарда касалланганларнинг 50 фоизи 45 ёш ва ундан кичик одамлар. Афсуски, бугунги кунда вафот этганлар орасида ёшлар ҳам бор. Ҳа, улар асосан сурункали касалликлари бўлган кишилар, бироқ нима бўлганда ҳам улар нисбатан ёш эканини қайд этиш лозим. Биттаси 39 да, бошқаси 34 ёшда эди. Бу инсонни мушоҳадага чорлайди», — дея пойтахт мэри ўринбосари Анастасия Ракованинг сўзларини келтирган «ТАСС».
Федерал штаб мамлакатда коронавирус бўйича рекордлар янгилангани — бир сутка ичида 954 та касалланиш ҳолати қайд этилгани, умумий касалланганлар сони эса 6,3 минг нафарга етганини хабар қилган.
Изоҳ (0)