Жанубий Кореяда 20 февралдан бери илк бор коронавирус юқтириб олганлар сони бир суткада 50 нафардан ошмади

Жанубий Кореяда февраль охиридан бери бир сутка ичида илк бор COVID-19 коронавирусини юқтириб олиш бўйича 47 та янги ҳолат қайд этилди. Мамлакатда 138 нафар киши инфекциядан тузалган, касалланганларнинг умумий сони 10 284 нафарга етган, 186 нафар одам касаллик оқибатида вафот этган. Бу ҳақда Корея Соғлиқни сақлаш вазирлигининг Касалликлар назорати ва профилактикаси марказлари ташкилоти (KCDC) маълум қилган, деб ёзмоқда «РИА Новости».

Жанубий Кореяда эпидемия бошланганидан бери сўнгги бор 20 февралда 50 нафардан камроқ одамда коронавирус аниқлангани ҳақида хабар берилган.

Жанубий Кореяда эпидемиологик хавф энг юқори даражага кўтарилган. Тэгу шаҳри ва Кёнсан-Пукто провинциясининг учта шаҳри фавқулодда ҳолатнинг энг юқори ҳудудлари деб эълон қилинган. 19 апрелга қадар мамлакат аҳолисидан зарурат бўлмаганда уйларини тарк этмаслик, спорт, кўнгилочар ва диний муассасаларга бормаслик сўралган. Ўқув йили 9 апрелдан онлайн режимида бошланади.

KCDC маълумотига кўра, 5 апрель 00:00 ҳолати бўйича 11 та янги касалланиш Сеулда, яна 8 таси Кёнгидо, 13 та эса Тэгу шаҳрида кузатилган, мамлакатнинг яна бошқа ҳудудларида жами 16 та ҳолат қайд этилган ва уларнинг аксариятида хориждан қайтган фуқароларда коронавирус борлиги аниқланган.

Бир сутка ичида яна уч нафар одам вафот этган ва ўлганлар сони 186 тани ташкил қилмоқда. Уларнинг 129 нафари Тэгуда, яна 45 киши Кёнсан-Пукто провинциясида, яна 7 нафар фуқаро Кёнгидо провинциясида, уч нафар одам эса Пусанда вафот этган. Бир нафар одам Ульсанда, яна бир киши Канвондо провинциясида вафот этган.

Сеулда 563 нафар, Тэгуда 6781 нафар, Кёнсан-Пукто провинциясида 1316 нафар, Кёнгидо провинциясида 580 нафар одам коронавирус билан касалланган. Пусандаги коронавирус юқтириб олган кишилар сони 122 нафарни ташкил қилади. Коронавирус юқтириб олганлар орасида 5 минг нафар одам «Синчхончжи» диний ташкилоти аъзолари ҳисобланади. 82,6 фоиз ҳолатларда оммавий тўпланишлар оқибатида касаллик юқтириб олиш кузатилган. Камида 757 та ҳолатда касаллик хориждан келган фуқароларда кузатилган.