Россия парламентининг қуйи палатаси депутатлари 2016 йилдан бошлаб ишлаб чиқарилган автомобилларни техник кўрикдан ўтказишни тўлиқ бекор қилиш тўғрисидаги қонун лойиҳасини қабул қилди. Амалдаги қонунларга кўра, ушбу жараёндан «уч ёшдан кичик» бўлган автомобиллар озод этилаётган эди, деб хабар беради Motor.
Ишлаб чиқарилганига ўн йилдан ошган автомобиллар учун ҳар йили техник кўрикдан ўтиш мажбурияти сақланиб қолган. Ишлаб чиқарилганига 4—10 йил бўлган транспорт воситалари эса ҳар икки йилда ушбу кўрикдан ўтиши керак, «тўрт ёшдан ошмаган» янги автомобиллар эса бундан тўлиқ озод этилади.
Шу кунгача техник кўрик ишлаб чиқарилганида 3 йил тўлмаган машиналар учун мажбурий эмас эди, 3—7 йил оралиғидаги машиналар эса ҳар икки йилда бир маротаба кўрикдан ўтарди.
Янги қонун енгил автомобиллар, тижорий транспорт воситалари ҳамда оғирлиги 3,5 тоннагача бўлган юк машиналари, шунингдек, мотоциклларга тегишли. Такси ва 3,5 тоннадан оғир бўлган юк машиналари учун эски қоидалар амалдалигича қолади.
Мазкур қонун лойиҳаси Россия Давлат думаси томонидан учинчи ўқишда қабул қилинди. Федерация кенгаши ҳам тузатишларни тасдиқлаган, янги тартиб-қоидалар 2021 йилнинг 1 март санасидан кучга киради.
Изоҳ (0)