28 март куни Қўқон шаҳри А.Хўқандий мавзесида яшовчи фуқаро Республика махсус комиссиясининг карантин тўғрисидаги қоидаларини бузиб, Telegram орқали Қўқонда икки кишида коронавирус аниқлангани ҳақида ёлғон хабар тарқатгани маълум бўлди. Бу ҳақда Бош прокуратура матбуот хизмати хабар берди.
1979 йилда туғилган, хусусий корхона раҳбари, Халқ депутатлари Қўқон шаҳар кенгаши депутати Х.Н. Қўқон шаҳридаги 2 кишида коронавирус касаллиги аниқлангани ва улар карантинга олингани ҳақида жонли тарзда аудиоёзув орқали ҳақиқатга тўғри келмайдиган уйдирма ва ёлғон маълумотларни тарқатган.
Мазкур ҳолат юзасидан Қўқон шаҳар прокуратураси томонидан 31 март куни Х.Н.га нисбатан Жиноят кодексининг 244-5-моддаси (Карантинли ва инсон учун хавфли бўлган бошқа юқумли касалликлар тарқалиши ҳақида ҳақиқатга тўғри келмайдиган маълумотларни тарқатиш) билан жиноят иши қўзғатилиб, тергов ҳаракатлари олиб борилмоқда.
Мавзуга доир:
Эслатиб ўтамиз, коронавирус пандемияси сабаб Ўзбекистон Республикасининг Жиноят, Жиноят-процессуал ҳамда Маъмурий жавобгарлик тўғрисидаги кодексларига ўзгартириш ва қўшимчалар киритилди. Унга кўра юқумли касаллик ҳақида ёлғон маълумот тарқатганлар энди жиноий жавобгарликка тортилади.
Изоҳ (0)