Ijtimoiy tarmoqlarda “Korzinka.uz” supermarketlar tamog‘ida kartoshka 18 ming so‘mdan, go‘sht 84 ming so‘mdan sotilayotgani haqidagi xabarlar tarqaldi. Kompaniya rahbari Zafar Hoshimov o‘zining Facebook’dagi sahifasida ushbu xabarlarga munosabatini yozib qoldirdi.
Uning aytishicha, bu vahimali xabarlarning hech birida xolislik va haqgo‘ylik yo‘q, ularni tarqatgan shaxslar odamlar asabi torligidan foydalanib, o‘zini piar qilish bilan ovora.
“Ular bu amallarini qasddan qilgan, deyishimning boisi, kichkina rangsiz 3 santimetr x 7 santimetr narxnomalarni ko‘rib, katta A4 formatdagi sap-sariq narxnomani ko‘rmaslikning aslo imkoni yo‘q”, — deydi u.
“Nahotki 83 990 so‘mlik antrekot rasmini olgan inson, yonidagi 48 990 so‘mlik chiroyli mol go‘shtining rasmini ko‘rmagan bo‘lsa yoki 17 990 so‘mlik yap-yangi yosh kartoshkani suratga olib, uni dostonlarga tushirayotgan insonlar, mayli, barracha yosh kartoshkaning farqiga borishmas, lekin qanday qilib, tog‘ bo‘lib uyilib yotgan 3 500 so‘mlik kartoshkani payqamay o‘ta olishgan ekan?”, — degan Zafar Hoshimov va odamlarni bunday fitna-nayranglarga uchmasdan, hushyor bo‘lishga chaqirgan.
Eslatib o‘tamiz, ijtimoiy tarmoqlarda bananlar orqali koronavirus yuqishi mumkinligi haqida gap-so‘zlar tarqalgach, uning savdosi uch barobarga tushib ketganda Zafar Hoshmov bunday yolg‘on ma’lumot tarqatmaslikni, bananlar Xitoyda emas, Ekvadorda yetishtirilib, Atlantika okeani orqali Boltiq dengizi portlariga, u yerdan Toshkentga olib kelinishini aytgandi.
Izoh (0)