Ярим ойдан ортиқ коронавирус билан яшаётган Тошкент — суратларда

15 март куни Республика вирусология институти лабораториясида Францияда бўлиб қайтган Ўзбекистон фуқаросида COVID-19 коронавирус инфекцияси аниқланган эди.

Республикада коронавирус туфайли карантин эълон қилинди. 16 мартдан хорижий давлатлар билан барча авиарейслар бекор қилинди. Ўзбекистонга коронавируснинг кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича республика махсус комиссияси қарорига мувофиқ, 22 мартдан Тошкентда жамоат транспорти ҳаракати тўхтатилган. 30 мартдан эса шахсий транспортдан фойдаланишга чеклов қўйилиши маълум қилинди.

Шунингдек, зарур бўлмаган ҳолларда айрим тоифадаги аҳолининг уйидан ташқарига чиқмаслиги, чиққан тақдирда ҳам шахсий ҳимоя воситалари (ниқоб)да бўлиши тавсия этилган эди. Кейинчалик махсус комиссия қарорига кўра, 27 мартдан бошлаб барча фуқароларга зарурат бўлмаганда кўчага чиқиш тақиқланган. Улар дори-дармон ёки озиқ-овқат маҳсулотларини харид қилиш учунгина ташқарига чиқиши мумкин.

31 март ҳолатига кўра, Ўзбекистонда коронавирусга чалинганлар сони 167 нафарга етган.

«Дарё» мухбири Тошкентнинг айрим кўчаларида бўлиб, киритилган ўзгаришлар шаҳар аҳолиси ҳаётида қандай акс этганини фотолавҳаларга муҳрлади.

Шахсий транспортдан фойдаланишга чеклов қўйилганидан бошлаб кўчалар тез-тез ҳувиллаб қолмоқда.

Шахсий автомобиллар ва жамоат транспортларига қўйилган чекловдан сўнг шаҳар кўчаларида бошқа транспорт воситалари фаоллашди.

Давлат хизматлари марказлари томонидан бериладиган махсус рухсатнома (стикер)лар асосида ҳаракатланаётган автотранспорт воситалари. 

27 мартдан бошлаб фуқаролар зарурат бўлмаганда кўчага чиқиши тақиқланган. Улар дори-дармон ёки озиқ-овқат маҳсулотларини харид қилиш учун чиқишмоқда.

Тақиқ ва чекловлардан кўпроқ жониворлар манфаат кўраётгани аниқ.

Тошкент шаҳрининг турли туманлари, бурчакларида жойлашган чиқиндихоналар, чиқинди қутилари эса бўш ҳолатда узоқ қолмоқда.

Тиббиёт ниқоблари ва чиқиндилар эса ҳамон бепарволарча исталган жойга ташлаб кетилмоқда.

Давлат хизматлари агентлигига келаётган одамлар оқими эса камаймади.