Латвия ва Эрондан эвакуация қилинган ҳамда Наманганда карантинга олинган фуқаролар карантин муддати тугагач, ўз вилоятларига қайтди. Бу ҳақда Наманган вилояти ҳокимлиги хабар берди.
Маълум қилинишича, Эрондан олиб келинган 37 нафар ва Латвиядан қайтган 175 нафар ўзбекистонлик Тўрақўрғон туманидаги юқумли касалликлар шифохонаси ҳамда «Косонсой» сиҳатгоҳида карантин кузатувига олинган эди.
Мазкур фуқаролар 31 март куни карантин муддатини тамомлаб, ўз вилоятларига жўнаб кетди.
Шунингдек, Жанубий Кореядан Ўзбекистонга олиб келинганлар худди шу тартибда Тошкент вилояти Бўстонлиқ туманидаги «Чотқол» сиҳатгоҳида карантинда бўлди. Улар орасида 29 нафар наманганлик ҳам бор эди. 31 март куни улар ҳам Наманганга қайтиб келди. Энди мазкур фуқаролар уй карантини шароитида шифокорлар кузатувида бўлади.
Эслатиб ўтамиз, 23 март куни Сеулдан чартер рейс орқали олиб келинган 196 нафар ўзбекистонлик Намангандаги «Чортоқ» санаторийсига жойлаштирилган. Шунингдек, Таиланддан олиб келинган 257 нафар ўзбекистонлик Фарғонадаги «Қизилтепа» сиҳатгоҳига, Жакартадан Бухорога олиб келинган 54-нафар ўзбекистонлик «Жўйизар» соғломлаштириш масканига, Туркиядан қайтарилган 240 нафар фуқаро Бухородаги Ситораи Моҳи-Хосага, Мисрдан олиб келинган 177 нафар фуқаро Навоий кон-металлургия комбинатига қарашли соғломлаштириш марказига 14 кунлик карантинга жойлаштирилган эди. Шунингдек, Ўзбекистоннинг 253 нафар фуқароси чартер рейс орқали Новосибирскдан олиб келинган эди. Аввалроқ, Шавкат Мирзиёев хориждаги ватандошларни Ўзбекистонга қайтариш ҳақида кўрсатма берган эди.
Изоҳ (0)