Коронавирус туфайли 25 мартдан фавқулодда ҳолат эълон қилинган Қирғизистонда илк марта онлайн тўй ўтказилди, деб хабар берди «Кактус медиа».
Бишкек шаҳрида яшовчи ёшлар тўйларини видеоалоқа орқали ўтказган.
Тўйда келин-куёвнинг қариндошлари, дўстлари ва ҳатто бошловчи ҳам иштирок этди.
«Бироз ҳаяжондаман, чунки видеоалоқа орқали ўтказилаётган тўйда биринчи марта бошловчилик қиламан», — дейди тўй бошловчиси.
Маълумотларга кўра, Қирғизистонда коронавирусга чалиниш бўйича 94 та ҳолат аниқланди. Уларнинг 3 нафари тузалган, яна 3 нафари оғир аҳволда. Республиканинг Бишкек, Ўш, Жалолобод, Новқат ва Ўш вилоятининг Қорасув тумани ҳудудида фавқулодда ҳолат режими ва комендантлик соати жорий этилган.
Эслатиб ўтамиз, Қирғизистонда коронавирус юқтириб олиш бўйича биринчи ҳолат 18 март куни аниқланган. Мамлакатда 16 мартдан бошлаб барча мактаблар ва олий таълим муассасалари 3 ҳафтага карантинга ёпилган. Шунингдек, Бишкекда коронавирус сабаб шахсий автомобилдан фойдаланишга тақиқ қўйилган.
Изоҳ (0)