Сингапур ҳукумати карантин қоидаларига риоя этмаган фуқаронинг паспортини бекор қилди, деб ёзади Straits Times.
53 ёшли Илья Виктор Го Сингапурдан Индонезияга чиқиб кетган ва 19 март куни қайтиб келган. У коронавирусга қарши курашиш чора-тадбирлари доирасида икки ҳафта уйдан чиқиш мумкин эмаслиги ҳақида огоҳлантириш олган.
Шунга қарамай Го ўн минг доллар жарима тўлаши ёки ярим йилга қамалишини билган ҳолда ўша куннинг ўзидаёқ яна Индонезияга кетган. У Сингапурга 24 март куни қайтган ва миграция хизматидан карантинни инкор этиб, «ўзининг масъулиятсиз хулқ-атворини намойиш этгани» ҳақида хат олган.
Сингапур миграция хизмати Гонинг паспортини бекор қилган ва унинг ишини Соғлиқни сақлаш вазирлигига оширган. Эркак паспортсиз давлат чегарасини кесиб ўта олмайди, лекин унинг фуқаросилигича қолади.
Го карантинни бузганлик учун қатъий жазо қўлланилган биринчи Сингапур фуқароси бўлди. Мамлакат ҳукумати февраль ойида ҳам карантинни бузган эркакни Сингапурда яшаш ҳуқуқини берувчи ҳужжатдан маҳрум қилган эди.
Маълумотларга кўра, Сингапурда коронавирусни юқтириш билан боғлиқ 802 та ҳолат аниқланган, 198 киши касалликдан соғайиб кетган, икки киши вафот этган.
Изоҳ (0)