Токиода ўтказилиши керак бўлган Олимпиада ўйинлари коронавирус сабаб 2021 йилга қолдирилгани ҳақида хабар берилганди. Samsung Electronics компанияси бу орқали 5G тармоғини қўллаб-қувватлайдиган смартфонларини япон истеъмолчиларига тақдим этиш имкониятидан маҳрум бўлди. 2021 йилда Apple 5G’га мос келадиган iPhone моделини тақдим этгудек бўлса, у Samsung билан бир қаторда рақобат қила бошлайди, деб хабар беради 3Dnews.
Counterpoint Research маълумотларига кўра, Apple маҳсулотлари япон бозорининг 53 фоизини эгаллайди, Samsung эса 4 фоизини. Жанубий Корея компанияси Олимпиада—2020 ўйинларига катта умид боғлаганди. Samsung 5G орқали Apple’ни ортда қолдириб, япон бозоридаги позициясини мустаҳкамлаб олиши мумкин эди. Мижозлар спорт мусобақаларини амалда бўлган 5G тармоқлари орқали кузатиши, шу сабабли Samsung’нинг янги смартфонларини харид қилишлари тахмин қилинганди.
Жанубий Корея компаниясининг Япония бозорида у қадар машҳур эмаслиги субъектив сиёсий омиллар билан изоҳланади. Икки давлат ўртасидаги тарихий келишмовчилик япон истеъмолчиларида қандайдир тарафкашликни юзага келтирган. Samsung 2015 йилдан бери Японияда сотиладиган смартфонларида ўз номидан фойдаланмайди, шунчаки — Galaxy савдо маркаси. Япон аудиториясини жалб этиш учун Samsung 2019 йилда саккиз қаватли дўконини очган бўлиб, у ердан минглаб турдаги Жанубий Корея смартфонлари ўрин олган.
Samsung ҳатто Япония бозорига маҳаллий телекоммуникация операторларидан бири билан ҳамкорликда тайёрланган 5G тармоқларини қўллаб-қувватловчи Galaxy S20 флагманининг махсус версиясини тақдим этиш заруриятини қайта кўриб чиқиши керак. Навбатдаги Олимпиада ўйинлари қачон ўтказилиши аниқ эмас, бироқ тахминларга кўра, 2021 йилнинг ёзида ўтказилиши мумкин. Бу вақтга келиб Apple 5G тармоғини қўллаб-қувватлайдиган ўзининг янги авлод iPhone’ларини тақдим этиши мумкин.
Изоҳ (0)