COVID-19 коронавирус инфекциясидан бутун дунёда 100 мингдан ортиқ одам халос бўлган. Бу ҳақда Жаҳон соғлиқни сақлаш ташкилоти раҳбари Тедрос Адан Гебрейесус махсус матбуот анжуманида маълум қилган.
ЖССТ раҳбари дунёда ярим миллиондан кўпроқ одам касаллик юқтириб олгани ва инфекция келтириб чиқарган пневмониядан 20 мингдан ортиқ киши вафот этганини тасдиқлаган.
Гебрейесус G20 виртуал саммитида давлатлар раҳбарларига мурожаат қилиб, уларга пандемияга қарши курашишнинг асосий йўналишлари ҳақида гапириб берганини ҳам эслатиб ўтган.
«Пандемияга қарши туриш учун биргаликда ҳаракат қилишингиз лозим. Биз бутун инсоният умумий душманга қарши бирлашиб курашишимиз керак. Ҳеч бир мамлакат ёлғиз кураша олмайди, фақат бирлашсакгина коронавирусни енга олмиз», — деган Гебрейесус.
ЖССТ раҳбарининг сўзларига кўра индивидуал ҳимоя воситаларининг етишмовчилиги пандемияга қарши курашдаги асосий муаммо бўлиб турибди. ЖССТ уларга муҳтож давлатларга 2 миллионта ҳимоя воситаси юборган, яқин орада яна шунча юбормоқчи, бироқ барибир тиббиёт анжомлари танқислиги кузатилмоқда.
«Касалликка қарши курашадиган вакцинани ишлаб чиқишга камида 12-18 ой вақт талаб этилади. Унинг яратилишида 45 та мамлакат фаол иштирок этмоқда, Норвегия ва Испанияда коронавирус юқтириб олган одамларнинг ўзлари ихтиёрий равишда тадқиқотларда қатнашмоқда», — дейди ЖССТ раҳбари.
Мавзуга доир:
- ЖССТ раҳбари фуқароларни фақат изоляция қилиш билан чекланиб қолмасликка чақирди
- БМТ коронавирусга қарши курашда камбағал давлатларга ёрдам режаси ишга туширилганини маълум қилди
- Буюк Британия бош вазири коронавирусга чалинди
- Путин G20 давлатларига савдо урушлари ва халқаро санкциялардан воз кечишни таклиф қилди
Изоҳ (0)