Бош прокуратура матбуот хизмати 2020 йил 23 март куни Бўзсув каналига қурилиш чиқиндиларини ташлаган фуқароларнинг маъмурий жазога тортилгани ҳақида хабар қилди.
Хабарга кўра, ҳайдовчи Ф.М. Юнусобод тумани «Оқтепа» маҳалласидаги Бўзсув кўчасида яшовчи У.А.нинг илтимоси бўйича Бўзсув канали қирғоғига туташган орқа томонини кенгайтириш ва боғ ташкил қилиши учун канал қирғоқларини қурилиш чиқиндилари билан тўлдирган.
У ўз бошқарувидаги HOWO русумли юк машинаси ҳамда шериги М.Х.нинг «ЗИЛ» русумли юк машинасида қурилиш чиқиндиларини олиб келиб, Бўзсув канали қирғоқларига тўккан ва сувни ифлослантирган.
Мазкур ҳолат юзасидан фуқаро У.А., Ф.М. ва М.Х.га нисбатан Ўзбекистон Республикаси Маъмурий жавобгарлик тўғрисидаги кодексининг 72-моддаси (Сув захираларини муҳофаза қилиш қоидаларини бузиш) ва 91-моддаси (Саноат чиқиндиларини, маиший чиқиндиларни ва бошқа чиқиндиларни тўплаш, ташиш, жойлаштириш, зарарсизлантириш, сақлаш, утилизация қилиш, қайта ишлаш, реализация қилиш чоғида табиатни муҳофаза қилиш талабларини бузиш) билан маъмурий жавобгарлик тўғрисида иш қўзғатилиб, ҳар бирига базавий ҳисоблаш миқдорининг 5 баравари, яъни 1 миллион 115 минг сўмдан жами 3 миллион 345 минг сўм миқдорида жарима тайинланган.
Шу билан бирга, ҳуқуқбузарлар томонидан содир этилган ҳуқуқбузарлик оқибати бартараф этилиб, Бўзсув канали қирғоғи чиқиндилардан тозаланган.
Бош прокуратура атроф-муҳит муҳофазаси, айниқса, сувни ифлослантиришга қаратилган ҳаракатларнинг олдини олишда барча юртдошларимиз масъул эканини эслатиб, бу борада барчани огоҳликка чиқаради. Акс ҳолда, бундай хатти-ҳаракатлар жиноий жавобгарликкача бўлган ҳуқуқий чоралар қўллашга сабаб бўлиши мумкин, дейилади хабарда.
Изоҳ (0)