Aktrisa Madina Muxtorova va uning o‘g‘liga nisbatan ochilgan jinoyat ishi tugatildi

Jinoyat ishlari bo‘yicha Yunusobod tuman sudida 19-mart kuni O‘zbekiston Respublikasi Jinoyat kodeksining 109-moddasi (qasddan badanga yengil shikast yetkazish) 2-qismi bilan gumon qilinuvchilar aktrisa Madina Muxtorova va uning o‘g‘li Sanjar Muxtorovga oid jinoyat ishi ko‘rib chiqildi. Bu haqda Oliy sud matbuot xizmati rahbari Aziz Obidov “Daryo”ga xabar berdi.

Sudda gumonlanuvchi Madina Muxtorova va Sanjar Muxtorov yarashuv to‘g‘risida ariza taqdim qilib, qilmishidan pushaymonligi, sodir etgan qilmishining oqibatlarini anglaganligi, jabrlanuvchiga yetkazilgan zararni to‘liq qoplaganligi, hozirda jabrlanuvchi bilan yarashib olganligi haqida ko‘rsatma berib, jinoyat ishini tugatishni so‘ragan.

Jabrlanuvchining qonuniy vakili D.Yo‘ldosheva jabrlanuvchi Mirfayz Alimjonov bilan sudda yarashuv to‘g‘risidagi ariza taqdim qilib, gumonlanuvchi Madina Muxtorova va Sanjar Muxtorovga nisbatan hech qanday da’vosi yo‘qligi, yetkazilgan zarar to‘liq qoplanganligi, yarashuv sud tomonidan tasdiqlanganidan keyin kelib chiqadigan huquqiy oqibatlarni tushunganini, jinoyat ishini tugatishni so‘ragan.

Fuqaroviy da’vogar Mirfayz Alimjonov sudda yarashuv to‘g‘risidagi arizani taqdim qilib, gumonlanuvchi Madina Muxtorova va Sanjar Muxtorovga nisbatan hech qanday da’vosi yo‘qligi, yetkazilgan zarar to‘liq qoplanganligi, yarashuv sud tomonidan tasdiqlanganidan keyin kelib chiqadigan huquqiy oqibatlarni tushunganini, jinoyat ishini tugatishni so‘ragan.

O‘zbekiston Respublikasi Jinoyat kodeksining 66-1-moddasi (yarashilganligi munosabati bilan jinoiy javogarlikdan ozod qilish)ga muvofiq, Jinoyat kodeksining 109-moddasi (qasddan badanga yengil shikast yetkazish)ning 2-qismida nazarda tutilgan jinoyatni sodir etgan shaxs o‘z aybiga iqror bo‘lgan bo‘lsa, jabrlanuvchi bilan yarashsa va yetkazilgan zararni bartaraf etsa, yarashganligi munosabati bilan jinoiy javobgarlikdan ozod etilishi mumkin.

Sud jabrlanuvchining qonuniy vakili, fuqaroviy da’vogar va gumonlanuvchilarning yarashuv to‘g‘risidagi arizalarini jinoyat ishi hujjatlari bilan o‘rganib, Yunusobod tuman prokurori yordamchisining jinoyat ishini yarashganlik munosabati bilan tugatish haqidagi fikrini eshitib, gumonlanuvchilarning aybiga iqrorligi, yetkazilgan zararning to‘liq qoplanganligi, yarashuv gumonlanuvchi, fuqaroviy da’vogar va jabrlanuvchining qonuniy vakili biron-bir tazyiqsiz, o‘z xohishi bilan bo‘layotganligi hamda O‘zbekiston Respublikasi Jinoyat kodeksining 109-moddasi (qasddan badanga yengil shikast yetkazish)ning 2-qismida nazarda tutilgan jinoyat, Jinoyat kodeksining 66-1-moddasiga muvofiq, yarashuvga tushishini inobatga olib, Madina Muxtorova va Sanjar Muxtorovga nisbatan jinoyat ishini yarashganlik munosabati bilan tugatishni lozim topgan.

“Shunga ko‘ra, jinoyat ishlari bo‘yicha Yunusobod tuman sudi sudyasi E.Shamsutdinova O‘zbekiston Respublikasi Jinoyat kodeksining 109-moddasi (qasddan badanga yengil shikast yetkazish) 2-qismi bi­lan gumon qilinuvchi Madina Muxtorova va Sanjar Muxtorovga nisbatan jinoyat ishi yarashilganligi munosabati bilan tugatish haqida ajrim chiqardi.

Jabrlanuvchi, jabrlanuvchining qonuniy vakili va fuqaroviy da’vogarga ushbu ish bo‘yicha ish yuritish­ni qayta tiklash yuzasidan iltimosnoma berish huquqi yo‘qolganligi tushuntirilgan”, — deyiladi xabarda.

Eslatib o‘tamiz, 2020-yilning yanvarida aktrisa Madina Muxtorovaning bir o‘g‘li boshqa o‘g‘li tomonidan kaltaklanishi holati ijtimoiy tarmoqlarda keng muhokama qilingan edi. Ijtimoiy tarmoqlar foydalanuvchilari hamda bolalar huquqlarini himoya qilish bilan shug‘ullanuvchi jamoatchilik vakillarining murojaatlari e’tiborga olinib, ushbu holat yuzasidan Madina Muxtorova va uning o‘g‘li Sanjar Muxtorovga nisbatan jinoyat ishi qo‘zg‘atilgan edi.