Тошкент вилояти ҳокимлиги ахборот хизмати вилоят ҳудудида ҳамшира коронавирус юқтириб олгани ҳақидаги хабарларни ёлғон деб атади. Бу ҳақда вилоят ҳокимлиги ахборот хизматининг Telegram’даги саҳифасида хабар қолдирилган.
Аввалроқ Тошкент вилояти ИИББ матбуот хизматига таяниб, Тошкент вилоятида беморларни даволаётган ҳамшира коронавирус юқтириб олгани ҳақида хабарлар тарқалган эди. Вилоят ИИББ матбуот хизмати ушбу ахборотни вилоят ҳокимлиги ахборот хизматидан олган.
Ҳокимликнинг коронавирус тарқалишига қарши ишлар тўғрисидаги 23 мартдаги дастлабки расмий маълумотида ҳозиргача вилоятда тўққиз кишида коронавирус аниқлангани, беморларнинг тўққизинчиси ҳамшира эканлиги маълум қилинган эди. Ҳокимлик ахборотида у айнан қаерда ҳамширалик қилгани айтилмаган.
23 март куни соат 19:50 да вилоят ҳокимлигининг Telegram каналида шундай ахборот пайдо бўлди: «Тошкент вилоятида ҳамшира коронавирусни юқтириб олгани ҳақидаги маълумот тасдиқланмади, бу мазмундаги хабарлар ёлғон. Ҳурматли блогер ва журналистлар, юзага келган ҳолат учун узр сўраймиз ҳамда айни мазмундаги хабарларни тарқатмаслигингизни илтимос қиламиз».
Вилоят ҳокимлигининг аниқлик киритишича, тўққизинчи бемор ҳамшира экани ҳақидаги ахборот манбаси вилоят соғлиқни сақлаш бошқармаси ходимлари бўлиб, улар техник хатога йўл қўйган. Айни вақтда тўққизинчи беморга оид янги тафсилотлар маълум қилинмаган.
Ҳокимликнинг 23 март куни коронавирус тарқалишига қарши қилинган ишлар тўғрисидаги расмий ахбороти соат 20:06 да таҳрирланган ҳолда такроран эълон қилинган — таҳрирланган ахборотдан вилоят ҳудудидаги коронавирусга чалинган беморлар ҳақидаги маълумот олиб ташланган.
Маълумот учун, аввалроқ Соғлиқни сақлаш вазирлиги коронавирус эпидемияси вақтида ёлғон, аҳоли орасида ваҳима келтириб чиқарувчи хабар тарқатган ОАВ ва блогерларни жавобгарликка тортишни назарда тутувчи қонун лойиҳасини жамоатчилик муҳокамаси учун эълон қилган эди. Вазирликнинг бу ташаббуси жамоатчилик томонидан эътирозлар билан кутиб олинган, айни вақтда мавжуд вазият ҳақида ўз вақтида ҳаққоний ахборот бермаган, ноаниқ ёки ёлғон ахборот берган давлат органларига ҳам чора кўрилиши лозимлиги таъкидланган эди.