Ўзбекистонда беморларни даволаётган ҳамширанинг коронавирус юқтириб олгани аниқланди

Қайд этилишича, 23 март ҳолатига кўра, вилоят юқумли касалликлар шифохонасида 101 нафар бемор бўлиб, улар мунтазам равишда тиббий назоратга олинган.

Коронавирус аниқланган илк бемор Франциядан келган. Унда 15 март куни инфекция аниқланган. Иккинчи беморда 16 март куни аниқланган бўлиб, биринчи бемордан юқтириб олган.

Учинчи бемор 14 март куни Лондондан учиб келган. 17 март куни инфекция аниқланган.

18 март куни COVID-19 инфекцияси тўртинчи фуқарода тасдиқланган. Бешинчи бемор 20 март куни аниқланган.

Коронавирус аниқланган олтинчи бемор 18 март куни Россиядан келгач, «Сокол" болалар оромгоҳида карантинда турган. Унда 20 март куни инфекция аниқланган.

Еттинчи бемор 18 март куни Москва орқали Швециядан келган. «Сокол» оромгоҳида карантинда бўлган, 21 март куни касаллик аниқланган.

Саккизинчи бемор 14 март куни Дубайдан келган. 22 март куни вирус аниқланган.

Тўққизинчи бемор ҳамшира бўлиб, айни пайтда даволаш ишлари олиб борилмоқда.

Хабарда ҳамширанинг вирусни қаерда юқтириб олгани ҳақида маълумот берилмаган. У коронавирус аниқланган беморларни даволовчи бўлганми, ёки карантинда сақланаётган фуқароларга қараётган бўлганми — аниқлик киритилмаган.

Соғлиқни сақлаш вазирлигининг маълумотига кўра, 23 март ҳолатига кўра, Ўзбекистонда коронавирус инфекциясини юқтириб олганлар сони 46 нафарга етган.