Қозоғистон пойтахти Нур-Султон шаҳри ҳокими Алтай Кулгинов коронавирус инфекциясининг тарқалишини олдини олиш бўйича олиб борилаётган чора-тадбирлар кучайтирилганини маълум қилди, деб хабар беради Tengrinews.

Кадр: Tengrinews

«Ҳурматли шаҳар аҳолиси! Бугун — 22 март соат 00:00 дан шаҳарга барча кириш ва чиқиш йўллари ёпилди. Блокпостлар ўрнатилди. Фақатгина озиқ-овқат маҳсулотлари, шунингдек, шаҳар аҳолиси учун зарур бўлган маҳсулотларнинг олиб кирилишига рухсат этилади. Халқаро аэропортга учиб келган барча йўловчилар тиббий кўрикдан ўтказилади, шундан кейингина улар шаҳарга кириши ва уйда карантинга риоя қилишлари зарур. Санитария талаблари кучайтирилди. Бутун шаҳар бўйлаб дезинфекция ишларини олиб борамиз. Буларнинг барчаси сиз ва яқинларингиз хавфсизлиги учун амалга оширилмоқда. Биз биргамиз», — дейди Кулгинов.

Нур-Султонга учиб келган йўловчилар ҳоким томонидан қабул қилинган ушбу чораларнинг нақадар аҳамиятли эканлигини таъкидлаб ўтган.

Янги қоидалар жорий этилганидан буён пойтахт тиббиёт ходимлари томонидан 10 та рейсда 900 дан ортиқ йўловчи текширувдан ўтказилган.

Аввалроқ Олмаота тўлиқ ёпилгани, шаҳарга кириш ва чиқиш тақиқлангани ҳақида хабар берилганди. Қозоғистонда оммавий тадбирлар бекор қилинди, мактаб ўқувчилари таътилга эртароқ чиқди, давлат органларига хорижга хизмат сафарига чиқиш тақиқланди. Мамлакатда коронавирус тарқалиши муносабати билан 16 мартдан 15 апрелга қадар фавқулодда ҳолат режими жорий қилинган.