Германия канцлери Ангела Меркель ўзини эмлаган шифокорда коронавирус инфекцияси аниқланганидан сўнг, уй карантинида қолишга қарор қилди, деб хабар беради Reuters.
Германия канцлери бу ҳақда 22 март куни карантин чора-тадбирлари янада қатъийлаштирилгани эълон қилинганидан сўнг билиб қолган. Янги тартиб-қоидага кўра, мамлакатда яқин икки ҳафта ичида икки кишидан ортиқ бўлган одамларнинг бир жойда тўпланиши тақиқланди.
Изоляция вақтида Меркель ўзининг хизмат мажбуриятларини бажаришни давом эттириш ниятида.
Сўнгги маълумотларга кўра, Германия COVID-19 пандемияси оқибатида энг кўп жабр кўрганлар сони бўйича бешта давлат қаторига киради. Жон Ҳопкинс университети маълумотларига кўра, мамлакатда 24 мингдан ортиқ одамда коронавирус аниқланган, вафот этганлар сони 92 кишига етган.
Таъкидланишича, Германия лабораторияларида ҳар ҳафта қарийб 160 мингта текширув ўтказилмоқда. Бу Европадаги бошқа давлатларнинг умумий ҳисобда ўтказган текширувларидан ҳам кўп.22 март ҳолатига кўра, бутун дунёда COVID-19 коронавируси билан касалланганлар сони 307 мингдан ошиб кетган. Ўзбекистонда эса вирусни юқтириб олганлар сони 45 кишига етди.
Изоҳ (0)