ИИВ Хавфсиз туризмни таъминлашни мувофиқлаштириш бошқармаси Ўзбекистонда коронавирус тарқалишининг олдини олиш, санитария-эпидемиологик вазиятнинг барқарорлигини ҳамда фуқароларнинг хавфсизлигини таъминлаш мақсадида, Тошкент вилояти ва республиканинг бошқа ҳудудларида хусусий тартибда ижарага берилаётган дала-ҳовлиларга бормасликни сўради.
Таъкидланишича, дала-ҳовлиларнинг қисқа муддатларга ижарага берилиши, уларга турли ҳудудлардан фуқароларнинг ташриф буюриши, аксарият дала-ҳовлиларда дезинфекция тадбирлари талаб даражасида олиб борилмаслиги ва санитария-эпидемиология қоидаларига риоя қилинмаслиги каби ҳолатлар ушбу жойларда вирусли инфекциялар юқиши ва тарқалишининг юқори хавфини келтириб чиқаради.
«Карантин вақтида энг хавфсиз жой ўзингиз яшаб турган уйингиз эканлигини унутманг», — дейилади хабарда.
Аввалроқ шифкорлар фуқароларни карантин вақти иложи борича кўчага чиқмасликка, санитария ва шахсий гигена қоидаларида риоя қилишга чақирган эди.
21 март ҳолатига кўра, Ўзбекистонда коронавирусга чалинганлар сони 41 нафарга етган. Шу кундан Ўзбекистонда чойхона ва ошхоналар ёпилди, 23 мартдан бошлаб эса тўйларнинг ўтказилиши бекор қилинади.
Изоҳ (0)