Ўзбекистонда барча таълим муассасалари коронавирус тарқалишига қарши профилактика мақсадида карантинга ёпилиши ортидан айрим фуқаролар ўртасида ваҳима бошланиб улгурди. Шу боисдан ҳам бозор ва супермаркетларда озиқ-овқат маҳсулотлари нархи ошиб кетгани ҳақида маълумотлар пайдо бўлди.
«Бухорода ҳам айрим ‘учар’ тадбиркорлар томонидан аҳолининг саросимага берилганидан фойдаланиб, маҳсулотлар нархини ошириб сотишга уриниши ҳолатлари кўзга ташланди», — дея хабар беради «Дарё» мухбири Лайло Ҳайитова.
Бухоро шаҳридаги «Бухоро қишлоқ хўжалиги маҳсулотларини улгуржи сотиш бозори» МЧЖ кечки бозоридаги ҳолат ўрганилганда картошка 5 минг сўмдан 6 минг сўмгача, пиёз 4—4,5 минг сўм, лимон 15 мингдан 20 минг сўмгача сунъий равишда оширилгани маълум бўлган. Бу жараёнда нохуш ҳолатлар ҳам кузатилган.
Бухоро вилоят Давлат солиқ бошқармаси ахборот хизматига кўра, жорий йил 15 март куни вилоятнинг барча деҳқон бозорларида кўплаб тадбиркорлар сабзавот маҳсулотлари нархини ўзбошимчалик билан сунъий оширган. 16 март куни эса саросимага берилган аҳоли бозорлар ва савдо дўконларидаги озиқ-овқат, сабзавот маҳсулотларини керагидан ортиқ харид қилган.
Шу куни вилоят Давлат солиқ бошқармаси, Бош прокуратура ҳузуридаги департамент билан ҳамкорликда вилоят ҳудудидаги бозорларда сотилаётган озиқ-овқат маҳсулотлари нархларининг сунъий ошишининг олдини олиш юзасидан ишчи-гуруҳ тузилган.
«Ҳозир вилоятимиздаги мавжуд барча деҳқон бозорларида қаттиқ назорат тартиби ўрнатилди. Аҳолининг саросимага тушишидан фойдаланиб, даромад топишга уринган тадбиркорларга нисбатан чоралар белгиланмоқда. Айни пайтда картошка нархлари 3—3,5 минг сўм, пиёз эса 2—2,5 минг сўмгача туширилди. Шунингдек, лимон нархини 11 минг сўмдан оширмаслик талаби қўйилди. Карам килограммига 700—800 сўм, тухум эса 470 сўмдан 600 сўмгача белгиланди», — деди вилоят Давлат солиқ бошқармаси бошлиғи Шерзод Ашуров.
Суриштирувга кўра, 15 март куни Шофиркон, Ғиждувон, Ромитан ва Пешку туман деҳқон бозорларида бирламчи сабзавотлар нархи 40—50 фоизга ошган. Жумладан картошка 6—7 минг сўмга, Қоракўл ва Олот туман деҳқон бозорларида эса 14 минг сўмгача кўтарилган.
Маълумотларга кўра, одамлардаги кучли саросима сабзавот маҳсулотларини керагидан ортиқ сотиб олишга ундаган. Бозорларда тартиб-интизомни ўрнатиш ва нарх-навони тўғри белгилаш учун олиб борилаётган саъй-ҳаракатлар сабабли харидорларнинг 5 килограммдан ортиқ картошка харид қилиши чекланган.
«Бу вилоятнинг бошқа бозорларига ҳам картошканинг тенг миқдорда тарқатилиши, шунингдек, аҳоли ва фуқароларнинг уни эҳтиёжига яраша харид қилиши имконини яратади. Олиб борилган тезкор ҳаракатлар натижасида айни пайтда вилоятнинг барча деҳқон бозорларида нарх-наволар барқарорлаштирилган», — дея ҳолатга баҳо беради Шерзод Ашуров.
Шунга қарамай, ҳолат ўрганилаётган пайтда Бухоро қишлоқ хўжалиги маҳсулотларини улгуржи сотиш бозорида фуқаро Улуғбек Комиловнинг тадбиркор сифатида давлат рўйхатидан ўтмасдан ҳужжатсиз фаолият юритаётгани ва картошкани 5 минг сўмдан сотаётгани тасдиғини топди. Шунингдек, ушбу бозорда аҳоли эътирозига сабаб бўлаётган ҳолатни вужудга келтираётган маҳсулотларни қиммат нархларда сотаётган фуқаро Жалолиддин Эсанов ҳам ҳужжатсиз тадбиркор бўлиб чиқди.
Таъкидланишича, 15 март куни бозорларда 1 кг саримсоқпиёз нархи 7,5 минг сўмга, исириқ нархи 7—8 минг сўмга сунъий равишда оширилган. Айни пайтда бир дона саримсоқпиёз нархи 2 минг сўм, исириқ эса 2—2,5 минг.
«Дарё» мухбири Бухоро шаҳридаги Korzinka.uz’да ҳам бўлди. Маълум бўлишича, бу ерда ҳам картошка муаммоси мавжуд.
Савдо мажмуасининг мева-сабзавот ва гўшт маҳсулотлари бўлими бошлиғи, «Адолат Алишер замини» кўп тармоқли фермер хўжалиги раҳбари Шерали Саидовга кўра, ушбу масала бартараф этилади. Мазкур бўлим ходимларининг билдирилишича, аҳоли тушкунлик ва саросимага тушгани боис, тадбиркор деҳқон бозоридан 5 тонна картошкани 5,5 минг сўмдан харид қилиб, аҳолига 3,5 минг сўмдан сотган.
«Бизда маҳсулотлар, албатта, бозор нарх-навосидан фарқ қилади. Лекин нархлар ўзгармаган. Аҳоли саросимага тушган пайтда уларни тўғри тушуниб, қўллаб-қувватладик. Қайси маҳсулот туридан талаб қилишларига қарамай, топиб бериш чораларини кўрдик. Икки кунда бўшаб қолаётган растларни ҳар ярим соатда тўлдириб турдик. Керагидан ортиқ харид қилиш исрофгарчилик оқибатларига олиб келиши борасида тушунчалар беришга ҳам ҳаракат қилдик. 18 мартдан бошлаб одамларга кўмак сифатида гўшт ва мева-сабзавотлар бўлимига кириб келадиган ҳар бир харидорга бепул тиббий ниқоблар тарқатишни бошладик», — деди тадбиркор Шерали Саидов.
Изоҳ (0)