O‘zbekistonda barcha ta’lim muassasalari koronavirus tarqalishiga qarshi profilaktika maqsadida karantinga yopilishi ortidan ayrim fuqarolar o‘rtasida vahima boshlanib ulgurdi. Shu boisdan ham bozor va supermarketlarda oziq-ovqat mahsulotlari narxi oshib ketgani haqida ma’lumotlar paydo bo‘ldi.
“Buxoroda ham ayrim ‘uchar’ tadbirkorlar tomonidan aholining sarosimaga berilganidan foydalanib, mahsulotlar narxini oshirib sotishga urinishi holatlari ko‘zga tashlandi”, — deya xabar beradi “Daryo” muxbiri Laylo Hayitova.
Buxoro shahridagi “Buxoro qishloq xo‘jaligi mahsulotlarini ulgurji sotish bozori” MChJ kechki bozoridagi holat o‘rganilganda kartoshka 5 ming so‘mdan 6 ming so‘mgacha, piyoz 4—4,5 ming so‘m, limon 15 mingdan 20 ming so‘mgacha sun’iy ravishda oshirilgani ma’lum bo‘lgan. Bu jarayonda noxush holatlar ham kuzatilgan.
Buxoro viloyat Davlat soliq boshqarmasi axborot xizmatiga ko‘ra, joriy yil 15-mart kuni viloyatning barcha dehqon bozorlarida ko‘plab tadbirkorlar sabzavot mahsulotlari narxini o‘zboshimchalik bilan sun’iy oshirgan. 16-mart kuni esa sarosimaga berilgan aholi bozorlar va savdo do‘konlaridagi oziq-ovqat, sabzavot mahsulotlarini keragidan ortiq xarid qilgan.
Shu kuni viloyat Davlat soliq boshqarmasi, Bosh prokuratura huzuridagi departament bilan hamkorlikda viloyat hududidagi bozorlarda sotilayotgan oziq-ovqat mahsulotlari narxlarining sun’iy oshishining oldini olish yuzasidan ishchi-guruh tuzilgan.
“Hozir viloyatimizdagi mavjud barcha dehqon bozorlarida qattiq nazorat tartibi o‘rnatildi. Aholining sarosimaga tushishidan foydalanib, daromad topishga uringan tadbirkorlarga nisbatan choralar belgilanmoqda. Ayni paytda kartoshka narxlari 3—3,5 ming so‘m, piyoz esa 2—2,5 ming so‘mgacha tushirildi. Shuningdek, limon narxini 11 ming so‘mdan oshirmaslik talabi qo‘yildi. Karam kilogrammiga 700—800 so‘m, tuxum esa 470 so‘mdan 600 so‘mgacha belgilandi”, — dedi viloyat Davlat soliq boshqarmasi boshlig‘i Sherzod Ashurov.
Surishtiruvga ko‘ra, 15-mart kuni Shofirkon, G‘ijduvon, Romitan va Peshku tuman dehqon bozorlarida birlamchi sabzavotlar narxi 40—50 foizga oshgan. Jumladan kartoshka 6—7 ming so‘mga, Qorako‘l va Olot tuman dehqon bozorlarida esa 14 ming so‘mgacha ko‘tarilgan.
Ma’lumotlarga ko‘ra, odamlardagi kuchli sarosima sabzavot mahsulotlarini keragidan ortiq sotib olishga undagan. Bozorlarda tartib-intizomni o‘rnatish va narx-navoni to‘g‘ri belgilash uchun olib borilayotgan sa’y-harakatlar sababli xaridorlarning 5 kilogrammdan ortiq kartoshka xarid qilishi cheklangan.
“Bu viloyatning boshqa bozorlariga ham kartoshkaning teng miqdorda tarqatilishi, shuningdek, aholi va fuqarolarning uni ehtiyojiga yarasha xarid qilishi imkonini yaratadi. Olib borilgan tezkor harakatlar natijasida ayni paytda viloyatning barcha dehqon bozorlarida narx-navolar barqarorlashtirilgan”, — deya holatga baho beradi Sherzod Ashurov.
Shunga qaramay, holat o‘rganilayotgan paytda Buxoro qishloq xo‘jaligi mahsulotlarini ulgurji sotish bozorida fuqaro Ulug‘bek Komilovning tadbirkor sifatida davlat ro‘yxatidan o‘tmasdan hujjatsiz faoliyat yuritayotgani va kartoshkani 5 ming so‘mdan sotayotgani tasdig‘ini topdi. Shuningdek, ushbu bozorda aholi e’tiroziga sabab bo‘layotgan holatni vujudga keltirayotgan mahsulotlarni qimmat narxlarda sotayotgan fuqaro Jaloliddin Esanov ham hujjatsiz tadbirkor bo‘lib chiqdi.
Ta’kidlanishicha, 15-mart kuni bozorlarda 1 kg sarimsoqpiyoz narxi 7,5 ming so‘mga, isiriq narxi 7—8 ming so‘mga sun’iy ravishda oshirilgan. Ayni paytda bir dona sarimsoqpiyoz narxi 2 ming so‘m, isiriq esa 2—2,5 ming.
“Daryo” muxbiri Buxoro shahridagi Korzinka.uz’da ham bo‘ldi. Ma’lum bo‘lishicha, bu yerda ham kartoshka muammosi mavjud.
Savdo majmuasining meva-sabzavot va go‘sht mahsulotlari bo‘limi boshlig‘i, “Adolat Alisher zamini” ko‘p tarmoqli fermer xo‘jaligi rahbari Sherali Saidovga ko‘ra, ushbu masala bartaraf etiladi. Mazkur bo‘lim xodimlarining bildirilishicha, aholi tushkunlik va sarosimaga tushgani bois, tadbirkor dehqon bozoridan 5 tonna kartoshkani 5,5 ming so‘mdan xarid qilib, aholiga 3,5 ming so‘mdan sotgan.
“Bizda mahsulotlar, albatta, bozor narx-navosidan farq qiladi. Lekin narxlar o‘zgarmagan. Aholi sarosimaga tushgan paytda ularni to‘g‘ri tushunib, qo‘llab-quvvatladik. Qaysi mahsulot turidan talab qilishlariga qaramay, topib berish choralarini ko‘rdik. Ikki kunda bo‘shab qolayotgan rastlarni har yarim soatda to‘ldirib turdik. Keragidan ortiq xarid qilish isrofgarchilik oqibatlariga olib kelishi borasida tushunchalar berishga ham harakat qildik. 18-martdan boshlab odamlarga ko‘mak sifatida go‘sht va meva-sabzavotlar bo‘limiga kirib keladigan har bir xaridorga bepul tibbiy niqoblar tarqatishni boshladik”, — dedi tadbirkor Sherali Saidov.
Izoh (0)