Uzbekistan Airways авиакомпанияси 2020 йил 17 март куни Тошкент—Москва—Тошкент йўналишида чет эл фуқароларини Москвага олиб бориш ва Ўзбекистон фуқароларини Москвадан Тошкентга олиб келиш учун парвозларни амалга оширади. Бу ҳақда авиакомпания томонидан маълум қилинди.

Фото: «Дарё»

Хабар берилишича, Тошкентдан рейс соат 10:00 да, Москвадан эса маҳаллий вақт билан соат 13:00 да амалга оширилади. Тушунмовчиликларни бартараф этиш учун компания биринчи навбатда 16, 17, 18 март кунлари бекор қилинган рейсларнинг йўловчиларини самолётга қабул қилади.

Ушбу рейс билан Тошкентга келган йўловчилар вақтинча карантинга жойлаштирилади. Шу муносабат билан авиакомпания мазкур рейс йўловчиларининг қариндошларидан уларни кутиб олиш учун Тошкент шаҳридаги аэропортга келмасликни сўраган.

Йўловчиларнинг вақтинча карантинда туриши масалалари бўйича Ўзбекистон Соғлиқни сақлаш вазирлиги ҳузуридаги Санитария-эпидемиология осойишталик агентлигига +99871 276-49-66 телефон рақами орқали мурожаат қилиш мумкинлиги эслатиб ўтилган.

Эслатиб ўтамиз, 16 мартдан бошлаб Ўзбекистон коронавирус сабаб авиа ва автоқатновларни тўхтатди. Хориждаги Ўзбекистон фуқароларини олиб келиш бўйича чартер рейслар амалга оширилади. Хусусан, Латвия ва Эрондан амалга ошириладиган чартер рейсларида олиб келинадиган фуқаролар Наманган вилоятидаги иккита тиббий муассасада карантинга жойлаштирилади.