Соғлиқни сақлаш вазирлиги Ўзбекистонда коронавирусдан илк ўлим ҳолати рўй бергани ҳақида тарқалган хабарни рад этди. Маълум бўлишича, The Asia Times сайтида «Ўзбекистонда бир кекса эркак коронавирусдан вафот этди» (В Узбекистане первая смерть от коронавируса умер мужчина) сарлавҳали хабар эълон қилинди.
Унда икки томонлама пневмония ташхиси қўйилган эркакда 14 март, шанба куни, коронавирусга чалингани тасдиқланиб касалхонага ётқизилгани, 17 март куни эса касалликдан вафот этгани айтилган. Шунингдек, у билан бирга яшаган ва алоқада бўлган шахслар шифокорлар назоратида экани қайд этилган. Манба сифатида Соғлиқни сақлаш вазирлиги матбуот хизмати ва бош санитар врачи Баҳодир Юсупалиев, деб кўрсатилган.
Соғлиқни сақлаш вазирлиги жамоатчилик билан алоқалар бўлими раҳбари Фурқат Санаев ушбу хабарга аниқлик киритди.
«Бу хабар мутлақо асоссиз, буткул ёлғондан иборат. Аввало Баҳодир Қаҳрамонович Юсупалиев бош санитар врач эмас, вазирнинг биринчи ўринбосаридир. Иккинчидан, сайтимизда бундай хабар умуман эълон қилинмаган. Энг муҳими, Ўзбекистонда коронавирус туфайли ўлим ҳолати қайд этилмади, қайд этилмасин ҳам.
Яна бир бор эслатиб ўтаман, вазирлигимиз бу борада барча расмий маълумотларни тезкорлик билан эълон қилиб бормоқда, ҳамиша эшикларимиз очиқ, нафақат кунлик, балки соатлик ахборотни етказиб турибмиз. Юртдошларимиздан ёлғон ахборот тарқатиш учун жавобгарлик мавжудлигини, хорижий ОАВда бу масалага жиддий ёндошишларини сўраб қолардим», — деб таъкидлаган.
Ўзбекистонда 17 март ҳолатига кўра, коронавирусга чалинган фуқаролар сони 10 кишига етди. Соғлиқни сақлаш вазирининг маълум қилишича, 16 март ҳолати бўйича 5,6 мингдан ортиқ одам карантинга олинган.
Аввалроқ Ўзбекистонда коронавирус ҳақида ҳақиқий вазиятни сохталаштириб талқин қилаётган 33 та аккаунт аниқлангани хабар берилган эди.
Изоҳ (0)