Мактабларда директор ва унинг икки ўринбосари, психолог, ёшлар етакчиси, фаррош ҳамда қоровул фаолиятини иш жойида амалга оширади. Бу ҳақда 17 март, сешанба куни, короновируснинг тарқалиши ва унга қарши кўрилаётган чоралар бўйича таълим муассасаларида амалга оширилаётган ишлар бўйича ўтказилаётган матбуот анжуманида маълум қилинди.
Анжуманда айтилишича, Ўзбекистон бош вазири Абдулла Арипов бошчилигидаги коронавирус инфекцияси тарқалишининг олдини олиш ва таълим муассасаларида санитария-эпидемиологик осойишталикни таъминлаш юзасидан республика махсус комиссияси томонидан қабул қилинган қарорга кўра, Ўзбекистондаги барча умумтаълим мактаб ўқувчилари учун 16 март кунидан таътил эълон қилинди.
Махсус комиссия йиғилишининг қарори билан, умумий ўрта таълим муассасалари ва ташкилотларда фаолият юритаётган ходимларга ўқувчилар учун қўшимча эълон қилинган таътил даврида навбатдан ташқари меҳнат таътилини бериш имконияти яратилган.
Бунда, 2019/2020-ўқув йили учун режалаштирилган таътил (21 мартдан 27 мартгача) даврида кўзда тутилган педагогик юкламалар педагоглар томонидан ўрнатилган тартибда ойлик иш ҳақлари сақлаб қолинган ҳолда масофадан туриб бажарилиши мумкин бўлади.
Масофадан туриб ўқув жараёнини ташкил этиш ҳамда таълим муассасаси ва ташкилотларнинг бино ва иншоотларини самарали сақлаш ишларини мувофиқлаштириш мақсадида қуйидаги лавозимларда ишловчи ходимлар ўз фаолиятини иш жойида амалга оширади:
- директор;
- ўқув ишлари бўйича директор ўринбосари;
- манавий маърифий ишлар буйича директор уринбосари;
- хўжалик ишлари бўйича директор ўринбосари (ёки хўжалик ишлари мудири);
- психолог;
- ёшлар етакчиси;
- фаррош;
- қоровул.
Шунингдек, меҳрибонлик уйлари ва болалар шаҳарчаларида тарбияланувчиларнинг хавфсизлигини таъминлаш мақсадида ушбу таълим-тарбия муассасаларига кириш ва чиқиш қатъий назоратга олиниб, турли хайрия тадбирлари чекланади.
Изоҳ (0)