Меҳнат вазирлиги: Карантин даврида болаларнинг ота-оналари меҳнат таътилига чиқишга ҳақли

Ўзбекистонда коронавирус билан касалланиш ҳолатлари аниқлангани сабабли барча таълим муассасалари карантин учун ёпилди ҳамда бошқа ташкилотларда санитар-гигиеник чоралар кучайтирилди. Бандлик ва меҳнат муносабатлари вазирлиги боғча болалари ва бошланғич синф ўқувчилари ота-оналарига таътил берилиши тартибларини баён қилди.

Унга кўра, фарзанди мактабгача таълим муассаси тарбияланувчи ёхуд бошланғич синф ўқувчиси бўлган, ишлайдиган она ёки отага иш берувчи ва ходим ўртасидаги келишувга кўра, фойдаланилмаган йиллик меҳнат таътили (Меҳнат кодекси 133-модда — «Йиллик меҳнат таътиллари») таътиллар жадвалидан қатъий назар берилади.

Агар ходим йиллик меҳнат таътилидан аввал фойдаланган бўлса ёки карантин тадбирлари ўтказилаётган даврда йиллик меҳнат таътилидан фойдаланиш истагини билдирмаса ёки биринчи иш йилида йиллик меҳнат таътилини олиш учун зарур бўлган иш стажи (олти ойдан кам бўлмаган меҳнат фаолияти)га эга бўлмаса, (Меҳнат кодекси 143,144-модда — «Таътилларни бериш тартиби») иш берувчи томонидан ходимларга уларнинг розилиги билан иш ҳақи сақланмаган ҳолда таътил берилади (Меҳнат кодекси 150-модда) ёки улар иш вақти тўлиқ бўлмаган (Меҳнат кодекси 119-модда — «Тўлиқсиз иш вақти») ишга ўтказилади. Бунда ишланган иш вақтига мутаносиб равишда иш ҳақи тўланади.

Шунингдек, карантин тадбирлари даврида иш берувчи ходимни (айниқса ҳомиладор аёллар, кексалар, имконияти чекланган шахслар, сурункали касалликларга чалинган шахслар) уларнинг розилиги билан масофавий (дистанцион) меҳнат ва касаначилик асосидаги меҳнатга ўтказиши мумкин.

Бунда ходим томонидан масофавий меҳнат доимий иш жойидан ташқарида, техник воситалар (компьютер, алоқа воситалари, шу жумладан интернетга уланиш ва ҳ.к.) мавжуд бўлган тақдирда электрон ҳужжатлар алмашинувидан фойдаланган ҳолда йўлга қўйилади. Касаначилик асосидаги меҳнат эса қонунчиликда ўрнатилган тартибда амалга оширилади.

Мактабгача таълим ташкилотлари, умумий ўрта таълим мактаблари, олий ва ўрта махсус таълим муассасаларининг масофавий таълим жараёнига жалб этилган ходимлар, шунингдек, карантин чоралари даврида таълим ташкилотларининг ишлашини таъминлаш учун зарур бўлган ходимларнинг иш ҳақи сақланиб қолинади.

Таълим муассасаларининг бошқа ходимларига меҳнат қонунчилигида белгиланган тартибда йиллик меҳнат таътили ёки иш ҳақи сақланмаган ҳолдаги таътил берилади ёки иш вақти тўлиқ бўлмаган ишга ўтказилади.

Юқоридаги ҳолатларнинг барчаси иш берувчи ҳамда ходимнинг ўзаро келишуви асосида амалга оширилади.