Ўзбекистонга коронавируснинг кириб келиши ва тарқалишининг олдини олиш чора-тадбирлар дастурини тайёрлаш бўйича республика махсус комиссиясининг 12 март куни бўлиб ўтган йиғилиши баёнига мувофиқ, Ўзбекистон 14 мартдан Франция, Испания ва Буюк Британия билан авиақатновларни тўхтатади. Бу ҳақда «Дарё»нинг ҳукуматдаги манбаси маълум қилди.
Маълум бўлишича, 14 мартдан бошлаб, Хитой, Жанубий Корея, Италия, Эрон, Франция ва Испания фуқароларининг ҳамда ушбу мамлакатларда доимий яшовчи фуқаролиги бўлмаган шахсларнинг Ўзбекистонга кириши вақтинча чекланади.
Шунингдек, 14 мартдан бошлаб чегара ўтказиш пунктлари орқали сўнгги 14 кун давомида мазкур давлатларга ташриф буюрган чет эл фуқаролари ва фуқаролиги бўлмаган шахсларнинг ҳам Ўзбекистонга кириши вақтинча чекланади.
Маълум қилинишича, жорий этилаётган чекловлар дипломатик ва хизмат паспорти эгаларига қўлланилмайди. Шунингдек, чекловлар санаб ўтилган олти давлатнинг фуқаролари ҳамда шу давлатларда доимий истиқомат қилувчи фуқаролиги бўлмаган шахсларга, агар улар Ўзбекистонга ташриф буюрганга қадар 14 кун давомида ушбу мамлакатларга ташриф буюрмаган бўлса, қўлланилмайди.
Зарурат туғилган тақдирда, санаб ўтилган давлатлардан Ўзбекистон фуқароларини олиб келиш учун чартер рейслар ташкил этилиши мумкин.
Бундан ташқари, вазирлик ва идораларга коронавирус инфекцияси билан боғлиқ эпидемик вазият барқарорлашгунга қадар раҳбарлар ва ходимларга чет эл сафарларини имкон қадар чеклаш тавсия қилинган
Юқорида санаб ўтилган давлатлардан чартер рейслар билан Ўзбекистонга олиб келинадиган фуқаролар Тошкент вилояти ҳудудидаги белгиланган тиббий муассасаларга 14 кунлик карантинга жойлаштирилади.
Шунингдек, республика ҳудудида ўтказилиши режалаштирилган халқаро тадбирлар ва спорт мусобақалари вақтинча тўхтатилади. Маҳаллий даражада режалаштирилган оммавий тадбирларни қисқартириш чоралари кўрилади.
Эслатиб ўтамиз, аввалроқ Ўзбекистонда коронавирус тарқалган 14 давлатдан келган фуқароларни карантинга олиш ҳақида қарор қабул қилинган эди.
Ўзбекистон Президенти Шавкат Мирзиёев 11 март, чоршанба куни, коронавирусга қарши кураш бўйича Соғлиқни сақлаш вазирлигига топшириқлар берди ҳамда мазкур вирус ҳақида гапирди. Шунингдек, Шавкат Мирзиёев Эрон—Туркманистон чегарасида қолиб кетган ҳайдовчиларни Ўзбекистонга қайтариш бўйича алоҳида кўрсатма берди.
ЖССТ 11 март куни коронавируснинг пандемия даражасига етганини маълум қилди. Мазкур ташкилот вакили эса коронавируснинг Ўзбекистонга кириб келиши эҳтимоли юқори эканини билдирди.
Сўнгги кунларда ижтимоий тармоқларда Ўзбекистонга корнавирус кириб келгани ҳақида тарқалган хабарлар Соғлиқни салқаш вазирлиги томонидан рад этилди. АОКА эса ОАВ ва блогерларни коронавирус ҳақида тасдиқланмаган хабарлар тарқатмасликка чақирди.
Аввалроқ, Uzbekistan Airways авиакомпанияси 1 март куни Сеулдан Тошкентга Жанубий Кореядаги Ўзбекистон фуқароларининг илк гуруҳи қабул қилгани ҳақида хабар берилганди. Миллий авиакомпания 1 мартдан бошлаб Жанубий Кореяда коронавирус авж олиши сабабли Сеулга бўлган қатновларни вақтинча тўхтатиб тургани ҳақида хабар берилганди. Шунингдек, Uzbekistan Airways Япония ва Италияда коронавирус авж олиши сабабли Uzbekistan Airways авиакомпанияси 2020 йилнинг 1 мартидан бошлаб Токио ва Римга бўлган йўналишдаги қатновларни вақтинча тўхтатгани маълум қилинганди. Бундан ташқари, Жидда ва Мадинага бўлган авиақатновлар ҳамда Афғонистон ва Эрон билан ҳам авиақатновлар вақтинчалик тўхтатилган.
Изоҳ (0)