Шавкат Мирзиёев Урганчда қуриладиган Жалолиддин Мангуберди мемориал боғи лойиҳаси билан танишди

Ўзбекистон Президенти Шавкат Мирзиёев Хоразм вилоятига 2018 йилда амалга оширган ташрифи чоғида Урганч шаҳрида Жалолиддин Мангуберди мемориал боғи ташкил этиш бўйича кўрсатма берган эди. Шунга мувофиқ лойиҳа таклифи тайёрланиб, бу галги ташриф чоғида намойиш қилинди. Бу ҳақда Президент матбуот хизмати хабар берди.

Давлат раҳбари ҳайкалнинг хомаки нусхасини, унинг атрофдан кўринишини синчиклаб кўрди. Мазкур ёдгорлик маҳобатли бўлиши, узоқдан ҳам яққол кўзга ташланиб туриши зарурлигини таъкидлади.

Боғ учун мўлжалланаётган майдон мутасаддилар билан муҳокама қилинди.

«Жалолиддин Мангуберди — буюк саркарда бобомиз, миллатимизнинг фахр-у ғурури. Унга бағишланган майдон шунга яраша катта, мазмунли бўлиши керак. Боғ бўйлаб Мангубердининг озодлик учун кураши, жанглари ҳақида лавҳлар ўрнатилиши зарур. Бу ерга келган одам фақат ҳайкални кўрмай, ўзига билим, куч-қудрат олсин, туристлар тарихимизни ўргансин», — деди Шавкат Мирзиёев.

Лойиҳани қайтадан пухта ишлаб чиқиш, транспорт ҳаракати учун қулайликларни инобатга олиш бўйича кўрсатмалар берилди.

Шавкат Мирзиёев Хоразм вилоятига сафари давомида «Ҳазорасп» эркин иқтисодий зонасидаги Develop Textile корхонасида, Янгиариқ туманидаги йилига 5 миллион доллар даромад келтирадиган иссиқхонада бўлди, Ичан-қалъага ташриф буюриб, Амир Тўра мадрасасининг реставрацияси билан танишди, Хивадаги Президент мактаби ўқувчилари билан мулоқот қилди. Президент ташриф давомида вилоят фаоллари билан йиғилиш ўтказди ҳамда Хоразмда 58 минг оила камбағаллик бўсағасида кун кечираётганини маълум қилди. Йиғилиш давомида Шавкат Мирзиёев автомобиллар нархи оширилганини танқид қилди. Хоразмда Damas ва Labo’нинг локализацияси оширилиши маълум қилинди. Давлат раҳбарининг Хоразм вилоятига сафари якунланди.