Коронавирус пандемияси футбол бўйича кўплаб мусоабақаларнинг бекор бўлишига сабаб бўлмоқда. Қуйида коронавируснинг футболга таъсири борасидаги сўнгги маълумотлар тақдим этилади.
Чемпионлар Лигаси ва Европа Лигаси баҳслари ҳам қолдирилди
УЕФА ташкилоти Европанинг клублар ўртасидаги энг нуфузли икки мусобақаси Чемпионлар Лигаси ҳамда Европа Лигасининг келаси ҳафта бўлиб ўтиши керак бўлган баҳсларини номаълум муддатга қолдирди. Бу ҳақда ташкилот расмий сайти хабар берди.
Унга кўра, Чемпионлар Лигасининг 1/8 финалидан ўрин олган жавоб беллашувлари 17—18 март кунлари бўлиб ўтмайди. Шунингдек, Европа Лигаси 1/8 финалидан ўрин олган 19 март кунги баҳслар ҳам ўтказилмайди. Ўйинлар кўчирилиши муносабати билан еврокубокларнинг 1/4 финалига қуръа ташлаш маросими ҳам қолдирилди.
Евро—2020 ҳам қолдирилади
2020 йил ёзида Европанинг 12 та давлатида бўлиб ўтиши режалаштирилган футбол бўйича Евро—2020 мусобақаси ҳам қолдирилиши кутилмоқда. Бу борада йиғилиш 17 март куни бўлиб ўтади. Унда мусобақани 2021 йил ёзига кўчирилиши ҳақида эълон қилинади.
Жанубий Американинг энг нуфузли мусобақаси — Либертадорес Кубоги ўйинлари ҳам қолдирилди
Коронавирус туфайли юзага келган вазият сабаб СONMEBOL ушбу қарорни қабул қилган. Яқин ҳафталар ичида мусобақа тақвимига ўзгартириш киритилади. 15—21 март санасида ўтказилиши керак бўлган баҳслар номаълум муддатга қолдирилган.
Нидерландия ва Чехияда ҳам чемпионатлар қолдирилди
Футбол бўйича Чехия ва Нидерландия чемпионатлари коронавирус туфайли вақтинча тўхтатилди.
Чехия ҳукумати 30 дан ортиқ киши иштирок этадиган тадбирларни ман қилди. Шу сабабли Чехияда кўплаб тадбирлар қатори спорт беллашувлари ҳам қолдирилган. Чехияда айни дамда 91 киши вирус билан зарарланган, ҳозирча қурбонлар йўқ.
Нидерландияда ҳам футбол чемпионати камида 31 мартга қадар қолдирилган. Ҳукумат шу қарорга келган.
Мамлакатда COVID-19 вирусига чалинганлар сони 503 нафарни ташкил этмоқда, 5 киши вафот этган.
«Арсенал» бош мураббийи ва «Челси» ҳужумчисида коронавирус аниқланди
«Арсенал» футбол клубининг бош мураббийи Микель Артета ва «Челси» ҳужумчиси Каллум Ҳадсон-Одои коронавирусга йўлиқди. Шунингдек, «Эвертон»нинг номи ошкор этилмаган ўйинчиси ҳам вирусни юқтириб олганини клуб матбуот хизмати тасдиқлади. Мерсисайд клуби баёнотига кўра, жамоадаги барча персоналлар изоляцияга олинган.
Англия чемпионатлари ҳам қолдирилди
АПЛ расмий сайти футбол бўйича мамлакат чемпионатлари тўхтатилганини эълон қилди. Унга кўра, Премьер Лига, Чемпионшип, Лига 1, Лига 2 мусоабақалари номаълум муддатга қолдирилди.
Францияда ҳам чемпионатлар тўхтатилди
Франция Профессионал футбол лигаси директорлар кенгаши пандемияга айланган коронавирус сабаб футбол бўйича Лига 1 ҳамда Лига 2 мусобақаларини тўхтатди.
Германияда ҳам футбол ўйинлари ўтказилмайди
Немис футбол лигаси раҳбарияти ҳам 16 март куни Германиянинг футбол бўйича юқори икки дивизиони ўйинларини 17 мартдан 2 апрелга қадар тўхтатиб туриш бўйича қарор қабул қилиши кутилмоқда.
Испанияда «Леганес» бош директори коронавирус юқтириб олгани аниқланди
«Леганес» клуби бош директори Мартин Ортегада ҳам вирус аниқланган. У билан алоқада бўлган барча изоляцига олингани айтилмоқда.
Маълумотларга кўра, Испанияда футбол мавсумининг ҳозир тўхтатиб қўйилиши клубларнинг 678,4 миллион евро йўқотишига олиб келади.
Қозоғистон чемпионатида ўйинлар мухлисларсиз ўтказилади
Қозоғистон футбол федерацияси мамлакат чемпионати ва кубоги баҳслари бўм-бўш стадионда ўтказилиши ҳақида бир қарорга келди. Ушбу қарор фуцал, пляж, аёллар ва болалар, ёшлар, ҳаваскорлар футболига ҳам тааллуқли.
Изоҳ (0)