Канада бош вазири Жастин Трюдо ва унинг рафиқаси Софи, аёлда ўткир респираторли касалликнинг енгил симптомлари кузатилганидан кейин ўз уйларида карантинда бўлишни маъқул кўрди. Бу ҳақда мамлакат администрациясига асосланиб «РБК» хабар қилган.

Фото: Getty Images

CTV телеканали Трюдонинг рафиқасидан COVID-19 бўйича қон таҳлили олингани, лекин ҳали натижалар маълум қилинмаганини қайд этган.

Бош вазир маъмуриятининг баёнотида Трюдода касаллик аломатлари йўқлиги, бироқ хавфсизлик нуқтаи назаридан унинг ўзи уйдан туриб ишлашга ўтишни маъқул кўргани айтилади.

Global News нашрининг ёзишича, Трюдо уйдан туриб телефон орқали музокаралар олиб боради ва дунё сиёсати етакчилари билан «виртуал учрашувлар» ҳам ўтказади. Бундан ташқари у коронавирусга бағишланган Канада ҳукуматининг махсус мажлисини ҳам масофадан туриб ўтказади. Трюдо 12—13 март кунлари ўтказиши режалаштирилган учрашувлар, жумладан, Канада провинцияларининг раҳбарлари билан тадбирлар бошқа муддатга қолдирилган.

Канада жамоатчилик соғлиқни сақлаш агентлигининг расмий маълумотларига кўра, 12 март ҳолатига кўра, мамлакатда COVID-19 билан касалланиш бўйича 103 та ҳолат қайд этилган. Касалланганларнинг асосий қисми Онтарио ва Британия Колумбияси провинцияларида (мос равишда 42 та ва 39 та ҳолат) кузатилган.

COVID-19 коронавируси туфайли Нидерландия ва Чехияда футбол чемпионатлари тўхтатилган, Олимпиада машъаласининг ёқилиш тадбири 1984 йилдан бери илк бор мухлисларсиз ўтказилган. Канаданинг қўшниси АҚШ ҳукумати коронавирус сабаб Европадан келувчиларга вақтинча тақиқ қўйган.