Наврўз байрамини муносиб ўтказиш ҳамда ички туризмни ривожлантириш мақсадида Uzbekistan Airways ва «Ўзбекистон темир йўллари» акциядорлик жамиятлари томонидан 2020 йилнинг 21 мартидан 23 мартига қадар барча ички рейсларга ҳамда «Афросиёб» тезюрар поездлари чипталарига чегирмалар эълон қилинди. Бу ҳақда Туризмни ривожлантириш давлат қўмитаси ахборот хизмати хабар берди.
Хабарга кўра, белгиланган дам олиш кунларида республика бўйлаб 346 та меҳмонхона, 77 транспорт ташкилоти, 104 та умумий овқатланиш жойи ва ресторанда ҳам чегирмалар жорий этилган.
Ўзбекистон Республикаси Президентининг 2020 йил 19 ноябрдаги «2020 йилда расмий саналарни нишонлаш даврида қўшимча ишланмайдиган кунларни белгилаш ва дам олиш кунларини кўчириш тўғрисида»ги фармонига асосан, давлат хизматчиларига Янги йил, Наврўз, ва Мустақиллик байрамлари муносабати билан 3 кун кетма-кет дам олиш имконияти яратилган.
Шунингдек, Ўзбекистон Республикаси Президентининг 2018 йил 28 ноябрдаги «Ўзбекистон Республикасида миллий маданиятни янада ривожлантириш концепциясини тасдиқлаш тўғрисида»ги қарорига мувофиқ, Ўзбекистон Республикаси Маданият вазирлиги ҳар йили 21—27 март кунлари «Театр томошалари ҳафталиги»ни ва унинг доирасида маданий-маърифий тадбирлар, жумладан, театр рассомларининг кўргазмалари, театр либослари ва декорациялари намойишларини ташкил қилиш, томошабинлар билан ижодкорлар ўртасида мулоқотлар ўтказиш ҳамда аҳолининг шу кунлари давлат театрларига бепул кириши тўғрисидаги таклифлари белгилаб қўйилган, дейилади қўмита хабарида.
Изоҳ (0)