Ўзбекистон Олий ва ўрта-махсус таълим вазирлиги «Менинг юртим» телеканалининг «Марказий студия» дастури томонидан тайёрланган «Пулини тўлаб қўйиб, ўқишга формасиз бориш мумкинми?» мазмунидаги лавҳага муносабат билдирди.
Вазирлик томонидан қайд этилишича, мазкур лавҳа ижтимоий тармоқларда турли талқинларни келтириб чиқарган. Мазкур лавҳада айтилишича, талабалар ўқишга формасиз келиши учун бир йилда 2,23 миллион сўм тўлаши ва бир йиллик лицензияни қўлга киритиши мумкин бўлади.
Олий ва ўрта махсус таълим вазирлиги ушбу хабарлар нотўғри эканлигини расман маълум қилган.
«Вазирлик тизимда талаба ва ўқувчиларнинг кийиниши бўйича бундай ғайриқонуний тартиб-қоидалар ўрнатилишига йўл қўймайди», — дейилади вазирлик муносабатида.
Шунингдек, Ўзбекистон Халқ таълими вазирлиги ҳам мазкур лавҳага ўз муносабатини билдирди.
Халқ таълими вазирлиги ҳам мазкур хабарлар нотўғри эканлигини таъкидлаган ва вазирликнинг бундай «ташаббуси» ҳақида хабари йўқлигини маълум қилган.
Вазирликнинг қайд этишича, Вазирлар Маҳкамасининг 2018 йил 15 августдаги «Давлат умумий ўрта таълим муассасалари ўқувчиларини замонавий мактаб формаси билан таъминлаш чора-тадбирлари тўғрисида»ги 666-сонли қарори билан давлат умумий ўрта таълим муассасалари ўқувчилари учун замонавий ягона мактаб формасини жорий этиш тартиби тўғрисидаги низом тасдиқланган бўлиб, мазкур низомда ўқувчининг ташқи кўринишига бўлган талаблар келтириб ўтилган.
Изоҳ (0)