Navro‘z bayramini munosib o‘tkazish hamda ichki turizmni rivojlantirish maqsadida Uzbekistan Airways va “O‘zbekiston temir yo‘llari” aksiyadorlik jamiyatlari tomonidan 2020-yilning 21-martidan 23-martiga qadar barcha ichki reyslarga hamda “Afrosiyob” tezyurar poyezdlari chiptalariga chegirmalar e’lon qilindi. Bu haqda Turizmni rivojlantirish davlat qo‘mitasi axborot xizmati xabar berdi.
Xabarga ko‘ra, belgilangan dam olish kunlarida respublika bo‘ylab 346 ta mehmonxona, 77 transport tashkiloti, 104 ta umumiy ovqatlanish joyi va restoranda ham chegirmalar joriy etilgan.
O‘zbekiston Respublikasi Prezidentining 2020-yil 19-noyabrdagi “2020 yilda rasmiy sanalarni nishonlash davrida qo‘shimcha ishlanmaydigan kunlarni belgilash va dam olish kunlarini ko‘chirish to‘g‘risida”gi farmoniga asosan, davlat xizmatchilariga Yangi yil, Navro‘z, va Mustaqillik bayramlari munosabati bilan 3 kun ketma-ket dam olish imkoniyati yaratilgan.
Shuningdek, O‘zbekiston Respublikasi Prezidentining 2018-yil 28-noyabrdagi “O‘zbekiston Respublikasida milliy madaniyatni yanada rivojlantirish konsepsiyasini tasdiqlash to‘g‘risida”gi qaroriga muvofiq, O‘zbekiston Respublikasi Madaniyat vazirligi har yili 21—27-mart kunlari “Teatr tomoshalari haftaligi”ni va uning doirasida madaniy-ma’rifiy tadbirlar, jumladan, teatr rassomlarining ko‘rgazmalari, teatr liboslari va dekoratsiyalari namoyishlarini tashkil qilish, tomoshabinlar bilan ijodkorlar o‘rtasida muloqotlar o‘tkazish hamda aholining shu kunlari davlat teatrlariga bepul kirishi to‘g‘risidagi takliflari belgilab qo‘yilgan, deyiladi qo‘mita xabarida.
Izoh (0)