Бухоро вилоятида божхона тўловларини тўламаслик мақсадида хорижий мамлакатдан олиб келинган иккита Howo русумли юк машинасининг ишлаб чиқарилган йилини нотўғри кўрсатиш орқали ноқонуний имтиёз олишга уриниш ҳолатлари фош этилди. Бу ҳақда Давлат божхона қўмитаси хабар берди.
Маълум қилинишича, Бухоро вилояти божхона бошқармаси ходимлари тегишли идоралар билан ҳамкорликда фуқаро Х.А. томонидан 485 миллион сўм имтиёз асосида олиб кирилаётган Howo русумли юк машинасининг ёрлиқларидаги маълумот ва транспорт воситасининг ҳолатини экспертизадан ўтказган.
Натижада мазкур автотранспорт воситаси ҳужжатларда кўрсатилганидек 2017 йилда эмас, балки 2014 йилда ишлаб чиқарилганлиги маълум бўлди.
Яна бир тезкор тадбир давомида фуқаро К.Ш.га тегишли Howo русумли юк машинаси ҳам тегишли идоралар билан ҳамкорликда экспертизадан ўтказилган.
Маълум бўлишича, 480 миллион сўм имтиёз асосида олиб кирилаётган мазкур транспорт воситаси ҳам 2017 йилда эмас, балки 2012 йилда ишлаб чиқарилган.
Юқоридаги ҳолатлар юзасидан божхона органлари томонидан суриштирув ҳаракатлари давом эттирилмоқда.
Изоҳ (0)