Баҳодир Жалолов ҳиндистонлик, Миразиз Мирзаҳалилов эса қозоғистонлик боксчини таслим қилиб, Иорданиядаги мусобақа финалига чиқди

Иорданиянинг Амман шаҳрида Токио—2020 Олимпиадасига лицензия берадиган мусобақанинг навбатдаги жанглари 10 март, сешанба куни ўтказилди.

Кечки дастурдаги баҳсларда икки нафар ўзбекистонлик боксчи ярим финалда иштирок этди.

-57 килограмм вазн тоифасида рингга кўтарилган Миразизбек Мирзаҳалилов қозоғистонлик Серик Темиржановга қарши жанг олиб борди. Ўзбекистонлик боксчи мазкур жангда катта устунлик билан ғалаба қозонди — 5:0.

+91 килограмм вазн тоифасида Ўзбекистон шарафини ҳимоя қилган Баҳодир Жалолов ҳиндистонлик Сатиш Кумарга имкон қолдирмади (5:0) ва финал йўлланмасига эга чиқди.

Шу тариқа ярим финалга етиб келган олти нафар ўзбекистонлик боксчидан уч нафари ҳал қилувчи босқичга йўл олди. Аввалроқ Элнур Абдураимов ҳам финал йўлланмасини нақд қилганди. Шаҳобиддин Зоиров, Бобоусмон Ботуров ва Санжар Турсунов эса мусобақадаги иштирокини якунлади.