Ички ишлар вазири Пўлат Бобожонов 7 март куни Қашқадарё вилоятида бўлиб, «Чироқчи воқеаси» бўйича яна 6 нафар ИИБ ходими ишдан олинганини маълум қилди. Бу ҳақда «Дарё»га вилоят ИИБ ахборот хизмати раҳбари Ирода Расулова хабар берди.

Пўлат Бобожонов.

Фото: «Дарё» / Мадина Нурман

Маълум бўлишича, Чироқчи туман ИИБ бошлиғи Фазлиддин Юсупов, туман ИИБ бошлиғининг ёшлар масалалари бўйича ўринбосари Норбек Қобилов, тарбиявий ишлар бўйича ўринбосар Нодир Исматов, тергов бўйича ўринбосар Дилшод Расулов эгаллаб турган лавозимидан озод этилган.

Туман ИИБ бошлиғининг биринчи ўринбосари Юнус Менгноров ва 4-сонли ИИБ катта профилактика инспектори Шерзод Раҳмонов эса ишдан бўшатилган. Алоҳида таъкидланишича, энди улар ички ишлар тизимида фаолият юритмайди.

Мавзуга доир: ИИВ матбуот котиби: ИИБ биносида одам ўлими — янгилик эмас

Эслатиб ўтамиз, Қашқадарё вилоятининг Чироқчи туманида мол ўғирлашда гумон қилинган 32 ёшли эркак 2020 йил 23 январь ИИБ ходимлари томонидан калтакланиши оқибатида вафот этганди. Кейинроқ ИИБнинг бошқа ходимлари ушбу жиноятни яшириш мақсадида гувоҳларга босим ўтказгани маълум бўлди.

Мавзуга доир: «‘Участкавойъларингни қутқариб қолсаларинг, ургани йўқ десаларинг, рози қилади». Чироқчилик ИИБ ходимлари қотилликни яшириш учун гувоҳларнинг оғзини ёпишга уринган

Мазкур ҳолат юзасидан жиноят иши очилиб, икки нафар ИИБ ходими қамоққа олингани ҳақида хабар берилди. Сўнгра фуқаронинг уриб ўлдирилишида яна 13 нафар ходимнинг қўли борлиги маълум қилинди.