Вазирлар Маҳкамасининг «Чет эл фуқаролари ва фуқаролиги бўлмаган шахслар томонидан Ўзбекистон Республикаси ҳудудида товарларни сотиб олишда тўланган қўшилган қиймат солиғини қайтариш (Tax-free) тизимини жорий этиш тўғрисида»ги қарори лойиҳаси муҳокамага қўйилди.
Чет эл фуқаролари ва фуқаролиги бўлмаган шахслар томонидан Ўзбекистон ҳудудида товарларни сотиб олишда тўланган қўшилган қиймат солиғини қайтариш (Tax-free) тизими Ўзбекистонда 2020 йил 1 июлдан жорий этилиши кутиляпти.
Ўзбекистон Давлат солиқ қўмитаси:
- Молия вазирлиги билан биргаликда чет эл фуқаролари ва фуқаролиги бўлмаган шахслар томонидан Ўзбекистон ҳудудида товарларни сотиб олишда тўланган қўшилган қиймат солиғини қайтариш тартиби тўғрисидаги низомни ишлаб чиқади ва тасдиқлайди;
- Бунда ушбу низомда Tax-free тизимида иштирок этувчи чакана савдо ташкилотлари томонидан бериладиган, олиб чиқиб кетилаётган товарларга нисбатан қўшилган қиймат солиғини қайтариш учун асос бўлувчи «ҚҚС қайтарилиши учун чек» махсус шаклдаги чекнинг шаклини ҳамда чакана савдо ташкилотларини Tax-free тизимида иштирок этишини билдирувчи махсус эмблемаларнинг намуналарини кўзда тутади;
- Ахборот технологиялари ва коммуникацияларини ривожлантириш вазирлиги ва Давлат божхона қўмитаси билан биргаликда Tax-free тизими иштирокчилари ўртасида ахборот алмашиш имконини берувчи Tax-free тизимининг ягона электрон маълумотлар базасини ишлаб чиқади;
- Давлат солиқ қўмитасининг марказий аппарати тузилмасида белгиланган умумий штатлари сони доирасида 2 та штат бирлигидан иборат бўлган қўшилган қиймат солиғини чет эл фуқаролари ва фуқаролиги бўлмаган шахсларга махсус қайтариш пунктлари билан ишлаш секторини ҳамда ҳудудий бўлинмалари тузилмасида белгиланган умумий штатлари сони доирасида 11 та штат бирликларидан иборат бўлган махсус қайтариш пунктларини ташкил қилади;
- 2020 йилнинг 1 июлига қадар Uzbekistan Airports АЖ билан биргаликда махсус қайтариш пунктларини Ўзбекистоннинг халқаро аэропортларида Ўзбекистоннинг давлат чегарасини ўтказиш пунктларини орқали кесиб ўтилганидан сўнг нейтрал ҳудудларда жойлаштирилишини ҳамда уларни зарур ускуналар ва замонавий техник воситалар билан жиҳозланишини таъминлайди.
Белгиланишича:
- Tax-free тизимининг ягона электрон маълумотлар базасини ишлаб чиқиш, такомиллаштириш, техник қўллаб-қувватлаш ва узлуксиз ишлашини таъминлаш бўйича буюртмачи Давлат солиқ қўмитаси ҳисобланади;
- Tax-free тизимининг ягона электрон маълумотлар базасини ишлаб чиқиш, такомиллаштириш, техник қўллаб-қувватлаш ва узлуксиз ишлашини таъминлаш ҳамда махсус қайтариш пунктларини зарур ускуналар ва замонавий техник воситалар билан жиҳозлаш Давлат солиқ қўмитасининг бюджетдан ташқари маблағлари ҳисобидан амалга оширилади.
Изоҳ (0)