Ўзбекистон футбол ассоциацияси Европа футбол ассоциациялари иттифоқи — УЕФА билан ҳамкорликда бир қанча лойиҳаларни амалга оширмоқчи.
Ўзаро ҳамкорлик доирасида 9—13 март кунлари «УЕФА Assist» ташаббуси доирасида ташкилотнинг халқаро алоқалар бошқармаси раҳбари Ева Паске бошчилигидаги УЕФА делегацияси Ўзбекистонда бўлади ва ЎФАнинг иш-фаолияти билан яқиндан танишади.
Ташриф доирасида ЎФА раҳбар ҳамда ходимлари билан, ПФЛ ва Суперлига клублари вакиллари билан учрашувлар ташкил этилади. ЎФА ва ПФЛнинг ҳар бир йўналиш бўйича олиб бораётган фаолияти УЕФА мутахассислари томонидан атрофлича ўрганилади ҳамда якунда ассоциация иш фаолияти самарадорлигини ошириш, мамлакатда футбол ривожланиш даражасини янада кўтаришга йўналтирилувчи қўшма лойиҳалар муҳокама қилинади.
Шунингдек, мутахасисларнинг Европанинг етакчи ассоциацияларида малака ошириши, Ўзбекистоннинг турли ёшдаги терма жамоаларининг мунтазам равишда Европада ташкил этиладиган халқаро мусобақаларда иштирокини таъминлаш каби масалалар ҳам кўриб чиқилади.
13 март куни эса мазкур ташриф якунларига бағишланган матбуот анжумани ҳам ташкил этиш режалаштирилган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)