O‘zbekiston futbol assotsiatsiyasi Yevropa futbol assotsiatsiyalari ittifoqi — UEFA bilan hamkorlikda bir qancha loyihalarni amalga oshirmoqchi.
O‘zaro hamkorlik doirasida 9—13-mart kunlari “UEFA Assist” tashabbusi doirasida tashkilotning xalqaro aloqalar boshqarmasi rahbari Yeva Paske boshchiligidagi UEFA delegatsiyasi O‘zbekistonda bo’ladi va O‘FAning ish-faoliyati bilan yaqindan tanishadi.
Tashrif doirasida O‘FA rahbar hamda xodimlari bilan, PFL va Superliga klublari vakillari bilan uchrashuvlar tashkil etiladi. O‘FA va PFLning har bir yo‘nalish bo‘yicha olib borayotgan faoliyati UEFA mutaxassislari tomonidan atroflicha o‘rganiladi hamda yakunda assotsiatsiya ish faoliyati samaradorligini oshirish, mamlakatda futbol rivojlanish darajasini yanada ko‘tarishga yo‘naltiriluvchi qo‘shma loyihalar muhokama qilinadi.
Shuningdek, mutaxasislarning Yevropaning yetakchi assotsiatsiyalarida malaka oshirishi, O‘zbekistonning turli yoshdagi terma jamoalarining muntazam ravishda Yevropada tashkil etiladigan xalqaro musobaqalarda ishtirokini ta’minlash kabi masalalar ham ko‘rib chiqiladi.
13-mart kuni esa mazkur tashrif yakunlariga bag‘ishlangan matbuot anjumani ham tashkil etish rejalashtirilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)