Россияда Суриядаги урушга жангарилар тайёрлаган қирғизистонлик қўлга олинди. У Ўзбекистонда қидирувга берилган шахс билан ҳамкорлик қилган

Россия тергов қўмитаси террорчиликка алоқадор фаолият билан шуғулланган меҳнат муҳожирини қўлга туширди. У Сурияга Истанбул орқали маблағ юборишдан ташқари ўз танишларини жангарилар сафида уруш олиб боришга даъват этганликда гумон қилинмоқда. Бу ҳақда хабар тарқатган «Фонтанка» нашри гумонланувчининг яқин қариндошлари Яқин Шарқда ҳалок бўлгани ёки қидирувга берилганини аниқлаган.

Хабарга кўра, 26 февралда агрегаторлардан бирида такси ҳайдовчиси 38 ёшли Қосимовни ҳибсга олган, Қирғизистон фуқароси бўлган гумондор РФ Жиноят кодексининг 205-моддаси «Террорчилик фаолиятига кўмак берганлик» аниқроғи Петербургда яшовчи танишларини Суриядаги жангарилар гуруҳларига жалб этишга уринганликда гумон қилинмоқда.

25 февраль куни тонгда Россия ҳуқуқни муҳофаза қилувчи органлари ходимлари томонидан гумондорнинг ижарадаги уйи текширилган. Унинг «Золотая корона» тўлов тизими орқали банкда ҳисоб рақами очмасдан пул маблағларини Истанбулга юборгани аниқланган. Пуллар Туркия пойтахтидан нақд кўринишда Сурияга юборилган. Маблағни олиш ва Сурияга юбориш ишларини Ўзбекистон ҳудудида қидирувга берилган Ғозиев деган шахс амалга оширгани маълум бўлган.

Шунингдек, тергов иши материалларида Қосимовнинг ватандошларидан олинган кўрсатмалар йиғилган. Уларга кўра, Қосимов танишларини аввал Туркияга сўнгра у ердан Сурияга боришга ва ғоялар учун курашишга чақирган.

Қосимов оила аъзоларининг ҳаммаси жангариларга қўшилган ёки уларни қўллаб-қувватлаб келади. Гумондорнинг онаси Туркиядан Қирғзистонга депортация қилинган ва у ерда икки йилга қамалган. Акаси 2014 йилда Суриядаги урушга кетиб у ерда ҳалок бўлган, синглиси эса жангарилар гуруҳига алоқадор деб гумон қилиниб қидирувга берилган.