«Ливерпуль» собиқ ҳужумчиси Дэниэл Старриж 2020 йилнинг 17 июнига қадар футболдан четлатилди.
Sky Sports’нинг хабар қилишича, мазкур санкция футболга оид ҳар қандай фаолият турига таалуқли. Бундан ташқари, Старриж 150 минг фунт миқдорида жаримага ҳам тортилган.
Англия футбол ассоциацияси футболчини тотализаторга оид қоидаларни бузганликда айбдор деб топган. Унинг амакиваччаси футболчининг трансферига пул тиккан.
Эслатиб ўтамиз, Старриж «Трабзонспор» клуби билан амалдаги шартномасини бекор қилган. У ёзда турк клуби билан 3 йиллик келишув имзолаганди.
Бундай ҳолат Старриж билан биринчи марта кузатилмаяпти. Қишки трансфер мавсумида футболчининг қариндоши Старрижнинг «Милан»га ўтишига 10 минг фунт тиккан, ўша вақтда томонлар келишувга яқин эди. Бироқ ҳужумчи «Вест Бромвич»га ижара асосида йўл олганди.
Аввалроқ Старриж қариндошига «Севилья»га ўтиши мумкинлигини билдирган ва бунинг учун 6 ҳафтага дисквалификация қилинган ва 75 минг фунт миқдорида жаримага тортилганди. Бу сафар жарима миқдори икки баробар кўпайтирилган, четлатиш муддати ҳам кўпайган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!