Хитойда янги турдаги COVID-19 коронавируси билан касалланган беморларнинг қарийб 50 минг нафари даволанишга муваффақ бўлди. Бу ҳақда Хитой Соғлиқни сақлаш миллий комиссияси хабар берди.
Маълумотларга кўра, ўтган бир сутка давомида мамлакатда вирус оқибатида вафот этиш бўйича 38 ҳолат қайд этилган бўлиб, 119 киши касалликка чалинган. Шу билан бирга 2652 нафар беморга шифохонадан жавоб берилган.
Ҳозирги вақтга келиб Хитой ҳудудида коронавирус билан касалланганлар сони 80 270 кишига етган. Вафот этганлар сони 2981 кишини ташкил этмоқда.
Жаҳон соғлиқни сақлаш ташкилотининг маълумотларига кўра, бутун дунё бўйлаб коронавирус билан касалланганлар сони 90 870 кишига етган бўлиб, 3110 киши вирус оқибатида вафот этган. Жанубий Кореяда 5328 кишида коронавирус аниқланган бўлса, вафот этганлар сони 32 кишини ташкил этмоқда. Италияда ушбу кўрсаткич тегишли равишда 2502 ва 79 нафарга тенг. Эронда эса 2336 кишида вирус аниқланган бўлиб, 77 киши вафот этган. Diamond Princess саёҳат кемасини қўшиб ҳисоблаганда Японияда 1000 кишида коронавирус аниқланган, вафот этганлар сони 12 кишига етган.
Эслатиб ўтамиз, Ўзбекистонда коронавирус тарқалган 14 давлатдан келган фуқароларни карантинга олиш ҳақида қарор қабул қилинди. Таъкидланишича, Ўзбекистон дунёда коронавирус тарқалгани туфайли тахминан бир миллиард доллар йўқотиши мумкин.
Изоҳ (0)