Футбол бўйича Испания чемпионатининг 26-турида 1 март, якшанба куни Мадрид ҳамда каталон жамоалари ўртасидаги қарама-қаршиликлар бўлиб ўтди.
Мусобақа жадвалида 2 очколик фарқ билан пешқадам бўлиб турган «Барселона» клуби яқин таъқибчиси ва азалий рақиби «Реал» майдонига ташриф буюрди.
Ушбу жамоаларнинг биринчи даврадаги баҳсида томонлар 0:0 ҳисобидаги дурангга рози бўлганди. Бироқ «Сантьяго Бернабеу» стадионида кечган навбатдаги «Эль-Класико»да мадридликларнинг қўли баланд келди.
Биринчи бўлим хавфли вазиятларга бой ўтган бўлса-да дарвозалар дахлсизлиги сақлаб қолинди. Танаффусдан сўнг ўз ўйинини кучайтирган мезбонлар учрашувнинг 71-дақиқасига келиб рақиб дарвозасига йўл топа олди. Тони Крооснинг чап қанотдаги ажойиб тўп узатишидан сўнг Винисиус Жуниор тер Штеген дарвозасини ишғол қилди. Ушбу вазиятда кичик рикошет меҳмонлар учун қимматга тушди.
Иккинчи таймга ҳакам томонидан қўшиб берилган дақиқаларда майдонга туширилган Мариано Диас ўнг қанотдан юришни амалга ошириб учрашувдаги якуний ҳисобни ўрнатди.
Мазкур ғалабадан сўнг Қироллик клуби жамғарган очколар сони 56 та етиб, мусобақа жадвалида биринчи ўринга кўтарилиб олди. «Кўк-анорранглилар» (55) эса 2-поғонага тушди.
Диего Симеоне бошчилигидаги «Атлетико» клуби «Эспаньол» майдонига сафар уюштирди. Меҳмонлар дастлаб Савичнинг автоголи туфайли ўз дарвозасидан тўп олиб чиқди. Танаффусдан сўнг «матрасчилар» Саулнинг фойдали хатти-ҳаракатидан кейин учрашувдаги мувозанатни тиклади 1:1. Баҳс якунига қадар таблодаги ушбу ҳисоб ўзгармади.
Шу тариқа 26 турдан сўнг 44 очко жамғарган «Атлетико» турнир жадвалида тўртинчи ўрин эгаллаб турибди. Ундан олдинги ўриндаги «Севилья» ҳисобида 46 очко мавжуд. «Эспаньол» эса 20 очко билан мусобақа жадвалининг 20-ўрнини банд этиб турибди.
Ла Лига
26-тур баҳслари
1 март, якшанба
«Реал Мадрид» — «Барселона» 2:0
Голлар: 1:0 – 71, Винисиус, 2:0 – 93, Мариано Диас.«Реал Мадрид»: Куртуа, Варан, Карвахаль, Рамос, Марсело, Вальверде (Васкес, 86), Каземиро, Иско (Модрич, 79), Кроос, Винисиус Жуниор, Бензема (Мариано, 90+2).
«Барселона»: тер Штеген, Семеду, Умтити, Пике, Альба, Артур (Ракитич, 81), де Йонг, Бускетс, Видаль (Бретуэйт, 69), Месси, Гризманн (Фати, 81).
Огоҳлантиришлар: Винисиус (11), Карвахаль (19), Альба (19), Месси (85)
«Эспаньол» — «Атлетико» 1:1
Голлар: 1:0 – 24, автогол Савич, 1:1 – 46 Сауль.«Эспаньол»: Диего Лопес, Эспиноса, Хави Лопес, Кабрера, Дидак Вила, Итурраспе (Мелендо, 71), Санчес, У Лей (Кальери, 71), Дардер, Эмбарба (Педроса, 81), де Томас.
«Атлетико»: Облак, Фелипе, Савич, Триппьер, Лоди, Томас, Сауль, Феррейра Карраско (Жоау Феликс, 56), Коке, Корреа (Витоло, 69), Мората (Диего Коста, 63).
Огоҳлантиришлар: Фелипе (6), Эмбарба (38), Томас (42), Коке (86), Лоди (89), Санчес (90), Хави Лопес (90).
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)