Futbol bo‘yicha Ispaniya chempionatining 26-turida 1-mart, yakshanba kuni Madrid hamda katalon jamoalari o‘rtasidagi qarama-qarshiliklar bo‘lib o‘tdi.
Musobaqa jadvalida 2 ochkolik farq bilan peshqadam bo‘lib turgan “Barselona” klubi yaqin ta’qibchisi va azaliy raqibi “Real” maydoniga tashrif buyurdi.
Ushbu jamoalarning birinchi davradagi bahsida tomonlar 0:0 hisobidagi durangga rozi bo‘lgandi. Biroq “Santyago Bernabeu” stadionida kechgan navbatdagi “El-Klasiko”da madridliklarning qo‘li baland keldi.
Birinchi bo‘lim xavfli vaziyatlarga boy o‘tgan bo‘lsa-da darvozalar daxlsizligi saqlab qolindi. Tanaffusdan so‘ng o‘z o‘yinini kuchaytirgan mezbonlar uchrashuvning 71-daqiqasiga kelib raqib darvozasiga yo‘l topa oldi. Toni Kroosning chap qanotdagi ajoyib to‘p uzatishidan so‘ng Vinisius Junior ter Shtegen darvozasini ishg‘ol qildi. Ushbu vaziyatda kichik rikoshet mehmonlar uchun qimmatga tushdi.
Ikkinchi taymga hakam tomonidan qo‘shib berilgan daqiqalarda maydonga tushirilgan Mariano Dias o‘ng qanotdan yurishni amalga oshirib uchrashuvdagi yakuniy hisobni o‘rnatdi.
Mazkur g‘alabadan so‘ng Qirollik klubi jamg‘argan ochkolar soni 56 ta yetib, musobaqa jadvalida birinchi o‘ringa ko‘tarilib oldi. “Ko‘k-anorranglilar” (55) esa 2-pog‘onaga tushdi.
Diyego Simeone boshchiligidagi “Atletiko” klubi “Espanyol” maydoniga safar uyushtirdi. Mehmonlar dastlab Savichning avtogoli tufayli o‘z darvozasidan to‘p olib chiqdi. Tanaffusdan so‘ng “matraschilar” Saulning foydali xatti-harakatidan keyin uchrashuvdagi muvozanatni tikladi 1:1. Bahs yakuniga qadar tablodagi ushbu hisob o‘zgarmadi.
Shu tariqa 26 turdan so‘ng 44 ochko jamg‘argan “Atletiko” turnir jadvalida to‘rtinchi o‘rin egallab turibdi. Undan oldingi o‘rindagi “Sevilya” hisobida 46 ochko mavjud. “Espanyol” esa 20 ochko bilan musobaqa jadvalining 20-o‘rnini band etib turibdi.
La Liga
26-tur bahslari
1-mart, yakshanba
“Real Madrid” — “Barselona” 2:0
Gollar: 1:0 – 71, Vinisius, 2:0 – 93, Mariano Dias.“Real Madrid”: Kurtua, Varan, Karvaxal, Ramos, Marselo, Valverde (Vaskes, 86), Kazemiro, Isko (Modrich, 79), Kroos, Vinisius Junior, Benzema (Mariano, 90+2).
“Barselona”: ter Shtegen, Semedu, Umtiti, Pike, Alba, Artur (Rakitich, 81), de Yong, Buskets, Vidal (Bretueyt, 69), Messi, Grizmann (Fati, 81).
Ogohlantirishlar: Vinisius (11), Karvaxal (19), Alba (19), Messi (85)
“Espanyol” — “Atletiko” 1:1
Gollar: 1:0 – 24, avtogol Savich, 1:1 – 46 Saul.“Espanyol”: Diyego Lopes, Espinosa, Xavi Lopes, Kabrera, Didak Vila, Iturraspe (Melendo, 71), Sanches, U Ley (Kalyeri, 71), Darder, Embarba (Pedrosa, 81), de Tomas.
“Atletiko”: Oblak, Felipe, Savich, Trippyer, Lodi, Tomas, Saul, Ferreyra Karrasko (Joau Feliks, 56), Koke, Korrea (Vitolo, 69), Morata (Diyego Kosta, 63).
Ogohlantirishlar: Felipe (6), Embarba (38), Tomas (42), Koke (86), Lodi (89), Sanches (90), Xavi Lopes (90).
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)