Қамоқхонада тикувчи, муомаласи ёмон, маданиятсиз: Гулнора Каримова ҳақида қамоқдошининг фикрлари

Тошкент вилоятининг Зангиота туманидаги 21-сонли аёллар колониясида жазо муддатини ўтаётган шаҳрисабзлик маҳкума у билан бирга бир жойда жазо муддатини ўтаган Гулнора Каримова ҳақидаги фикрлари билан ўртоқлашди. Бу ҳақда «Kun.uz» хабар бермоқда.

Унинг сўзларига кўра, у ва бошқа маҳкумалар Гулнора Каримова билан бирга «бир оилада яшагандек яшаган».

«Гулнора Каримова ҳақида бу ерга келгунча деярли эшитмагандим, қамоққа келгач уни танидим. У биз билан бир бўлимда яшади. Шундагина уни Гулнора Каримова эканини билдим. У билан деярли бир оилада яшагандек яшадик. Бирга овқатландик, бир жойда нафас олдик», — деди.

«Ҳаётда бир шиорим бор: ким эдим-у ким бўлдим? Гулнора Каримованинг ҳаёти ҳам менга катта сабоқ бўлди. Шу аёл менда яшашга, ҳаётга бўлган қизиқишни орттирди. Ўзимга ўзим Гулнора Каримова ким эди, мана у ҳам шу ерда-ку дедим», — дея қайд этиб ўтди шаҳрисабзлик маҳкума.

Айни вақтда, у Гулнора Каримова ҳақидаги шахсий фикри яхши эмаслигини тан олган. «Уни ҳеч қачон олий маълумотли, маданиятли ва тарбияли қиз деб ўйламайман», — дея қўшимча қилди у.

«Жиноятчи сифатида бу ерда бўлсак ҳам, инсон сифатида аслида кимлигимиз гапларимиз, муомаламиз ва ўзимизни тутишимизда яхшироқ кўринади. Сўзлаш, тинглаш, муомала ва кийиниш маданияти бор. Мен шу нарсаларни Гулнора Каримовада кўрмадим. Булар менинг шахсий фикрларим», — деди у.

Унинг айтишича, Гулнора Каримова колонияга илк келган вақтида бу ердаги шароитларга кўниккан. «Қовун қовундан ранг олади. У ҳам биздан ‘ранг олди’. Аммо кейинчалик маҳкумалар ва ходимларга муомаласи ўзгара бошлади. Охир-оқибатда ўзининг ҳурматини йўқотди», — деди маҳкума.

«У билан жуда кўп саломлашавермасдим, чунки эрталаб ишга кетардим. Кечки пайт эса кутубхонага борардим... У давлатдан қарзи бўлгани учун муассаса ҳудудидаги ишлаб чиқариш корхонасида ишларди. Шу корхонада тикувчи эди», — дея маълум қилди маҳкума.

Шаҳрисабзлик маҳкума қамоқдоши Гулнора Каримова қамоқхона овқатларидан бош тортиб, фақат печенье еб кун кўргани ҳақидаги гаплар қисман ҳақиқат эканлигини айтди. «Бу ердан ҳам овқатланарди, уйидан келган ‘передача‘ларни ҳам ерди», — деди у.