Қатар пойтахти Доҳага 28 февраль куни амалий ташриф билан келган Ўзбекистон ташқи ишлар вазири Абдулазиз Комилов бошчилигидаги делегация «Толибон» ҳаракатининг Қатардаги сиёсий ваколатхонаси раҳбари мулла Бародар Охунд билан учрашди.
Ўзбекистон Ташқи ишлар вазирлиги матбуот хизматининг қайд этишича, учрашув давомида Афғонистонда барқарор ва узоқ муддатли тинчлик ўрнатиш мақсадида тинч сиёсий жараённи илгари суриш билан боғлиқ масалалар муҳокама қилинган.
Мулла Бародар Президент Шавкат Мирзиёевга Афғонистон муаммоларига доимий эътибор қаратгани учун миннатдорлик билдирган.
У Ўзбекистоннинг саъй-ҳаракатлари туфайли афғон можароси яна халқаро ҳамжамиятнинг диққат марказида эканлигини эътироф этган.
«Толибон» ҳаракати сиёсий ваколатхонаси раҳбари, тарихнинг мураккаб машаққатларига қарамай, Ўзбекистон афғон халқининг энг ишончли дўсти бўлгани ва эканлигини таъкидлаган, бу айниқса Афғонистон тинчлик ва иқтисодий кўмакка жуда муҳтож бўлган ҳозирги вақтда яққол намоён бўлган.
Шу ўринда мулла Бародар Ўзбекистоннинг Афғонистонда тинч сиёсий жараённи бошлаш, мамлакатда турли иқтисодий лойиҳаларни амалга ошириш борасидаги саъй-ҳаракатларини алоҳида таъкидлаган.
«Бу саъй-ҳаракатларнинг асосий мақсади афғон халқининг фаровонлиги ва ривожланиши, Афғонистоннинг тинч ва барқарор давлат сифатида тараққий этиши эканлиги қайд этилди», — дейилади ТИВ ахборотида.
Маълумот учун, 29 февраль куни Доҳада АҚШ ва «Толибон» ўртасида «тинчлик келишуви» имзоланди. Келишувни имзолаш маросимида Ўзбекистон ташқи ишлар вазири Абдулазиз Комилов бошчилигидаги делегация ҳам қатнашди.
Изоҳ (0)