Коронавирус сабабли Эрон фуқароларининг Россияга кириши тақиқланди

Россия ҳукумати коронавирус тарқалишига қарши кураш доирасида Эрон фуқароларининг мамлакатга киришини вақтинча тўхтатди. Бу ҳақда Meduza хабар берди.

Маълум қилинишича, Россия ҳукуматнинг 28 февраль, жума куни, эълон қилинган қарорига мувофиқ, чекловлар Россияга ўқишга, ишлашга, шунингдек, шахсий, сайёҳлик ва транзит мақсадида келмоқчи бўлган эронликларга нисбатан қўлланилади.

Эрон билан авиақатновлар ҳам чекланган. Эрондан келган чет элликлар чегарадан фақат Москвадаги Шереметьево аэропорти орқали ўтиши мумкин. 28 февраль кунидан бошлаб Эрондан Россиянинг бошқа аэропортларига амалга ошириладиган парвозлар бекор қилинди.

Шунга ўхшаш чекловлар Жанубий Кореядан амалга ошириладиган рейсларга нисбатан ҳам қўлланилади. Мазкур мамлакат билан авиақатновлар 1 март кунидан тўхтатилади.

Жанубий Кореяда 28 февраль куни эрталабки ҳолатга кўра, касалланганлар сони 2022 кишига етди, бир кунда яна 256 киши вирус юқтирган. Мамлакатда 13 киши касалликдан вафот этди.

Расмий маълумотларга кўра, Эронда коронавирус ташхиси қўйилган 245 кишидан 26 нафари вафот этган. Жаҳон соғлиқни сақлаш ташкилоти тахмин қилишича, Эронда касалланганлар сони ҳозиргача маълум ҳолатларга қараганда анча кўп бўлиши мумкин. Эрон соғлиқни сақлаш вазири ўринбосари ҳамда хотин-қизлар ва оила масалалари бўйича вице-президент коронавирус билан касалланган. Эроннинг Ватикандаги собиқ элчиси коронавирус туфайли вафот этди.

Сўнгги маълумотларга кўра, Озарбайжонда Россия фуқаросида коронавирус аниқланди. Беларусь, Литва ва Янги Зеландияда коронавирус билан касалланган илк беморлар аниқланди. Шунингдек, Хитойда коронавирус билан касалланганларнинг қарийб 46 фоизи тузалгани маълум бўлди. Коронавирус Европа бўйлаб тарқалишда давом этмоқда. Саудия Арабистони 7 та давлат фуқароларига сайёҳлик визасини беришни тўхтатди.

Коронавирус сабаб «Ювентус»—«Интер» ва А Сериянинг яна тўртта ўйини томошабинларсиз ўтади. «Пахтакор»нинг ОЧЛдаги ўйини эса қолдирилди. Швейцарияда эса Женева автосалони бекор қилинди.

ЖССТ раҳбари барча давлатларни коронавируснинг муқаррарлиги ҳақида ўйлашга чақирди. Ўзбекистон соғлиқни сақлаш вазири коронавирус муҳокамасига бағишланган видеоселектор йиғилиши ўтказди ҳамда Ўзбекистонда коронавируснинг олдини олишда амалга оширилаётган ишлар хотиржам бўлишга асос бўлмаслиги айтилди.