Мўғулистон президенти Халтмаагийн Баттулга маъмуриятининг матбуот хизмати давлат раҳбари Хитой ташрифидан қайтгач, карантинга жойлаштирилгани ҳақида ОАВда тарқалган хабарларни тасдиқлади. Бу ҳақда «РИА Новости» агентлиги хабар бермоқда.
Мўғулистон президенти 27 февраль, пайшанба куни, Хитойда ташриф билан бўлиб, Хитой раҳбари Си Цзиньпин ва бош вазири Ли Кэцян билан музокалар ўтказган эди. Ташрифдан сўнг ОАВда президент Баттулга Мўғулистонга қайтиши билан 14 кунлик карантинга олингани ҳақида хабарлар тарқалди.
«Президент карантинга жойлаштирилганини тасдиқлаймиз», — дея маълум қилди Мўғулистон президенти матбуот хизмати.
Президент маъмурияти сайтида эълон қилинган ахборотга кўра, Хитойга сафар қилган делегация таркибида ташқи ишлар вазири, Мўғулистоннинг Хитойдаги эчлиси, Фавқулодда вазиятлар бўйича миллий агентлик раҳбари, президент маъмурияти раҳбари, шунингдек, президентнинг ташқи сиёсат бўйича маслаҳатчиси бўлган.
Ўтказилган учрашувлар вақтида Мўғулистон президенти Хитой томони эпидемияга қарши курашда муваффақиятга эришишига ишонч билдирган, шунингдек, Хитой раҳбари Си Цзиньпинга Мўғулистон халқи номидан совғага 30 минг қўй берилиши ҳақидаги сертификатни топширган эди.
«У коронавирус эпидемиясининг тарқалишидан мўғул халқи ҳам хавотирда эканлиги, чунки Мўғулистон ва Хитой ўртасидаги чегара 4700 километрни ташкил этишини таъкидлаб ўтганди», — дейилади хабарда. Баттулга чегарадаги чекловлар эпидемиологик вазият билан боғлиқлиги, кейин бекор қилинишини айтганди.
Аввалроқ Эрон соғлиқни сақлаш вазири ўринбосари ва Эроннинг аёллар ва оила масалалари бўйича вице-президенти коронавирус юқтириб олгани, Эроннинг Ватикандаги собиқ элчиси эса коронавирус инфекциясидан вафот этгани ҳақида хабар берилган эди.
Изоҳ (0)